Dili, 01 Dezembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, lidera serimónia Izár Bandeira inísiu fulan Dezembru, iha resintu MJDAK Lecidere, Dili. Iha biban ne'e, Ministru Nelyo Isaac Sarmento hato'o diskursu ne'ebé fó korajen no husu responsabilidade ba funsionáriu kazuais no permanente hotu atu hametin sira-nia dedikasaun ba servisu.

Ministru hamutuk ho Diretór Jerál sira, husu ba funsionáriu sira atu haka'as aan hodi hatudu disiplina no produtividade servisu.

SERVISU KOLETIVU NO RESPONSABILIDADE LIDERANSA

Tuir Sua Exelénsia Ministru, servisu hotu ne'ebé MJDAK iha tenke konsidera ema hotu nian, hodi bele hatudu produtividade, kreatividade, no disiplina atu oferese no kontribui ba dezenvolvimentu.

Nelyo Isaac Sarmento hatete: “Ha’u husu ba imi hotu katak servisu ne’ebé Ministériu ne’e iha la bele senti ema ida ka rua nian maibé ita hotu nian, tanba ne’e hatudu imi nia produtividade no disiplina servisu hodi bele kontribui no oferese matenek ne’ebé imi iha atu dezenvolve ita nia rai.”

Ministru mós husu ba Kargu Xefia sira atu hatudu ezemplu di’ak ba funsionáriu sira, atu nune'e funsionáriu sira bele simu responsabilidade atu halo servisu ho matenek kreatividade no produtividade.

PREPARASAUN BA REFORMA LEI NO ASEAN

Governante ne'e hateten katak tempu ona atu idak-idak avalia nia aan rasik. Ministériu sei implementa Lei Reforma ba funsionáriu lubuk ida iha tinan oin (2026), no ema ne'ebé atu kontinua servisu mak sira ne'ebé iha idade produtivu no hatudu dedikasaun atu serví Nasaun.

Além de ne'e, Ministru mós fó orientasaun ba funsionáriu no Kargu Xefia sira atu kontinua aprende lian Inglés, tanba Timor-Leste tama ona iha membru ASEAN no sei lidera mós reuniões ASEAN nian ne'ebé sei halo ho lian Inglés.

Serimónia Izár Bandeira ne'e partisipa husi Diretór Jerál Desportu, Diretór Jerál Servisu Korporativu, Diretór Jerál Arte no Kultura, Diretór Nasionál, Kargu Xefia, no Funsionáriu sira hotu iha MJDAK.

#MídiaMJDAK