DILI, 1 Outubru 2025 – Konsellu Ministrus (KM) hala’o sorumutu iha Palásiu Governu, Díli, ne’ebé partisipa hosi Vise Primeiru-Ministru sira no membru Governu tomak, inklui Ministru Juventude, Desportu, Arte no Kultura (MJDAK), Nelyo Isaac Sarmento. Iha sorumutu ne’e, Governu aprova Dekretu-Lei importante haat (4) no Rezolusaun rua (2) hodi reforsa protesaun sosiál no seguransa nasionál.

1. Apoiu Finanseiru Dala Ida ba Família Martir Libertasaun Nasionál

KM aprova projetu Dekretu-Lei, ne’ebé aprezenta hosi Ministru Asuntus Kombatentes Libertasaun Nasionál, Gil da Costa Monteiro “Oan Soru”, atu fó apoiu finanseiru dala ida de’it ba membru família (inan-aman ka maun-alin) hosi Martir sira Libertasaun Nasionál nian ne’ebé la husik hela erdeirus.

Montante: $10.000 Amerikanu.

Benefisiáriu: Inan-aman sira ka, bainhira sira laiha, maun-alin sira hosi Martir sira.

Objetivu: Rekoñese no valoriza sakrifísiu husi Martir sira no garante justisa sosiál ba sira-nia membru família besik ne’ebé esklui husi pensaun tuir Estatutu Kombatentes nian.

Apoiu ne’e labele tau hamutuk ho pensaun sira seluk. Karik iha benefisiáriu liu ida, montante sei fahe hanesan.

2. Kria Subsídiu Moras hodi Fortalese Seguransa Sosiál

Governu aprova projetu Dekretu-Lei, ne’ebé aprezenta hosi Vise-Ministra Solidariedade Sosiál no Inkluzaun, Céu Brites, kona-ba rejime jurídiku protesaun sosiál bainhira moras iha ámbitu rejime kontributivu seguransa sosiál nian.

Subsídiu Moras: Kria subsídiu moras nian, ne’ebé garante traballadór sira rejista iha rejime kontributivu hetan benefísiu garantia sosiál hodi substitui parsialmente rendimentu ne'ebé lakon tanba inkapasidade temporáriu ba serbisu.

Valór: Sei korresponde ba persentajen ida hosi saláriu referénsia, husi 60% to'o 80%, depende ba durasaun inkapasidade.

Durasaun: Períodu másimu loron 120, no bele extende to'o loron 365 iha kazu moras grave.

Ho diploma ne’e, Governu hakat tan pasu ida hodi habelar rejime kontributivu seguransa sosiál, hodi hamenus dezigualdades entre setór públiku no privadu.

3. Harii Gabinete Interministeriál Jestaun Krize (GIJK)

KM aprova Projetu Rezolusaun Governu ne’ebé aprezenta hosi Ministru Defeza, Donaciano do Rosário Gomes, ne’ebé kria Gabinete Interministeriál Jestaun Krize (GIJK).

Objetivu: Koordenasaun no definisaun kooperasaun interministeriál iha situasaun risku grave ka ameasa ba seguransa nasionál.

Estrutura: Prezide hosi Primeiru-Ministru no kompostu husi Vise-Primeiru-Ministru sira, Ministru Defeza, Ministru Interiór, Ministru Justisa, Ministru Negósius Estranjeirus, Ministra Finansas, Ministru Administrasaun Estatál, no Xefe másimu sira husi F-FDTL, PNTL, no Servisu Nasionál Intelijénsia Estratéjika.

Vigénsia: Rezolusaun ne’e sei vigora to'o loron 6 fulan-Janeiru 2026.

4. Kansela Lisensa Jogos no Apostas Online

Ikusliu, Konsellu Ministrus aprova Projetu Rezolusaun Governu, ne’ebé aprezenta hosi Ministru Prezidénsia Konsellu Ministrus, Agio Pereira, atu determina kanselamentu lisensas ne’ebé fó ona ba operasaun jogos no apostas online.

Rezolusaun ne’e mós bandu lisensa foun sira tanba haree ba risku boot sira ne’ebé identifika ona ba seguransa nasionál, estabilidade sosiál, integridade ekonómika no reputasaun internasionál nasaun nian.

#MídiaMJDAK