DILI, 26 Outubru 2025 – Repúblika Demokrátika Timor-Leste (RDTL) ofisiálmente sai membru permanente ba dala-11 iha Organizasaun Nasoens Sudeste Aziátiku (ASEAN). Selebrasaun istóriku ne'e hala'o iha Dili, Largo Lecidere, ho tema boot "TOGETHER WE RISE" hodi marka loron ne’ebé mehi naruk nasionál atinje ona.

Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa ativamente, hamutuk ho membru Governu Konstitusionál IX, hodi komemora adezaun ne'ebé ofisiálmente realiza iha Malázia iha loron 26 Outubru 2025.

VPM Hato'o Agradesimentu ba Pasiénsia Povu Nian

Vise-Primeiru-Ministru (VPM), Mariano Assanami Sabino, reprezenta Sua Exelénsia Primeiru-Ministru, hato'o diskursu plenu ho emosaun no agradesimentu ba povu Timor-Leste tomak.

VPM realsa katak adezaun ne'e mak rezultadu husi pasiénsia, determinasaun, no espíritu luta povu nian, ne'ebé hein mehi ne'e tinan naruk.

"Povu Timor-Leste hein tinan naruk nian laran, pasiénsia no determinasaun, no ohin realiza duni mehi ne’ebe tinan naruk nia laran hein hela... agora ba oin sai ona família ida hamutuk ho ASEAN," afirma VPM Mariano Assanami.

Papél MJDAK iha Espasu ASEAN

Partisipasaun Ministru Nelyo Isaac Sarmento nian hatudu katak juventude, desportu, arte no kultura iha papél kruziál no importante iha prosesu integrasaun rejionál.

Ministru MJDAK nian realsa katak adezaun ba ASEAN ne'e loke dalan foun ba: Kooperasaun no Dezenvolvimentu Ekonómiku. Interkámbiu Kultura ne'ebé sei enrikeze identidade nasionál. Benefísiuba joven Timoroan sira hodi sai kompetitivu liután iha espasu rejionál.

Lideransa Nasionál Komemora Adezaun

Serimónia ne'e hamutuk ho prezensa másima husi lideransa nasionál no instituisaun sira. Partisipa iha eventu ofisiál ne'e: Prezidente Parlamentu Nasionál, Distinta Deputada Maria Fernanda Lay, hamutuk ho membru Parlamentu sira.Asesór Prinsipál Prezidente Repúblika ba Asuntu Polítiku no Militár, Tenente-Jerál Reformadu Lere Anan Timur. Embaixadór ASEAN nian iha Timor-Leste, no Embaixadór sira seluk.

Serimónia ne'e remata ho espíritu unidade no determinasaun hodi hamutuk ho ASEAN hodi atinje prosperiedade.

#MídiaMJDAK