DILI, 19 Setembru 2025 — Ministru Juventude, Desportu, Arte no Kultura (MJDAK), Nelyo Isaac Sarmento, no Sekretáriu Estadu Arte no Kultura (SEAC), Jorge Soares Cristovão, ohin fó orientasaun ba ekipa téknika hosi Diresaun Nasionál Desportu kona-ba preparasaun ba Jogu Fronteira Cup. Reuniaun ne'e hala'o iha salaun Magna MJDAK, Largo Lecidere, Dili.

Ministru Nelyo Isaac Sarmento (NIS) husu ba Diretór-Jerál Desportu no xefe sira seluk iha MJDAC atu serbisu maka'as hodi halo preparasaun ne'ebé di'ak tebes ba jogu ne'e, ne'ebé sei hahú iha loron 6 Outubru 2025.

Priodidade no Orsamentu

Diretór Nasionál Desportu para Todos, Egas da Rosa Freitas, esplika katak jogu ne'e sei foka liu ba munisípiu fronteira tolu: Covalima, Bobonaro, no Oé-Cusse.

Orsamentu totál ba Jogu Fronteira Cup mak $125.000, ne'ebé inklui mós kurida kuda ho orsamentu $6.300. Diretor Egas hatutan katak tinan ida ne'e la posivel atu konvida partisipante sira husi Indonézia, maibé sira sei inklui iha planu ba eventu tinan oin mai.

Atividade Desportivu

Jogu ne'e sei inklui modalidade desportivu hanesan: Kurida Kuda: Fó prioridade ba team sira ne'ebé eziste ona iha Covalima iha klase B no C. Futeból: Sei partisipa husi komunidade sira husi Bobonaro no Covalima, no mós husi orgaun institusionál ne'ebé eziste iha Covalima. Basketeból: Sei partisipa husi Bobonaro, Oé-Cusse, no Covalima, inklui mós orgaun institusionál sira iha Covalima.

Reuniaun ne'e partisipa mós husi Xefe Gabinete MJDAK, Egas Barros Godinho, Diretór-Jerál Desportu, João Maria Rodrigues, no Diretór Nasionál Finansas, Guido Monteiro.

#MídiaMJDAK