DÍLI, 29 JANEIRU 2026 (MJDAK) – Sua Eselénsia Ministru Juventude, Desportu, Arte no Kultura (MJDAK), Nelyo Isaac Sarmento, simu vizita kortezia husi ekipa Xanana Gusmão Reading Room (XGRR) no reprezentante husi The Duke of Edinburgh’s International Award Australia, kinta-feira ne’e, iha Gabinete MJDAK, Díli.

Delegasaun ne’e lidera husi Koordenadora Programa XGRR, Sra. Maria Santos Dias Ximenes, akompaña husi National Operations Manager International Award Australia, Sra. Cathy McInerney (MBA GAICD GCIM). Enkontru ne’e foka ba aprezentasaun relatóriu progresu koperasaun ne’ebé implementa ona iha Munisípiu Díli, liuliu iha Postu Administrativu Cristo Rei, Suku Hera.

Relatóriu Progresu 2025: Dezenvolve Lideransa Juventude

Iha enkontru ne’e, parte XGRR aprezenta relatóriu badak kona-ba implementasaun programa iha tinan 2025 ne’ebé foka ba dezenvolvimentu kbiit, abilidade, no responsabilidade juventude nian liuhusi sistema Online Record Book (ORB).

Pontu importante husi atividade foin lalais ne’e inklui:

Formasaun no Orientasaun: Treinu ba lider sira kona-ba estrutura Prémiu Duke of Edinburgh nian.

Monitorizasaun Atividade Aventura: Susesu hala’o atividade aventura iha Foho Horta, Cristo Rei, no Ulmera (Likisá) ne’ebé envolve eskola sira hanesan UNAMER no mós sítiu JDN, CETL, no Aileba.

Sertifikasaun: Serimónia entrega sertifikadu ba lider sítiu sira nu’udar rekoñesimentu ba sira-nia dedikasaun.

Desafiu no Vizaun ba 2026

Maske hasoru desafiu tékniku hanesan limitasaun ba ekipamentu informátika (laptop) no asesu internet, programa ne’e konsege fó impaktu pozitivu ba dezenvolvimentu pesoál no envolvimentu komunidade. Ba tinan 2026, XGRR ho parseiru Austrália halo ona planeamentu hodi espande programa ne’e ba sítiu foun hamutuk 10.

Sua Eselénsia Ministru Nelyo Isaac apresia tebes relatóriu ne’ebé aprezenta no rekoñese katak programa "International Award" ne’e sai hanesan instrumentu ne’ebé kmanek tebes hodi prepara jerasaun foun ne’ebé iha disiplina, konfiansa, no kapasidade lideransa ne’ebé maka’as.