BOBONARO, 24 FEVEREIRU 2026 – Ministériu Juventude, Desportu, Arte no Kultura (MJDAC), liuhusi Diretór Jerál Juventude, David Tomás de Deus, hamutuk ho Reprezentante UNICEF iha Timor-Leste, Patrizia Di Giovanni, hala’o vizita kortezia ba Munisípiu Bobonaro hodi observa direta progresu husi grupu benefisiáriu sira.

Vizita ne’e foka ba grupu rua ne’ebé hetan ona apoiu fundu husi parseria MJDAK no UNICEF, mak hanesan: Asosiasaun Leosibe Haburas Agrikultura (haki’ak ikan) no Asosiasaun Tane Produtu Lokál (kuda modo-tahan), ne’ebé lokaliza iha Aldeia Timatam, Suku Ritabou, Postu Administrativu Maliana Vila.

Iha biban ne’e, Diretór Jerál Juventude, David Tomás de Deus, afirma katak Governu liuhusi MJDAK iha polítika estratéjika atu hametin kolaborasaun ho Ministériu Edukasaun (ME) no autoridade lokál sira. Objetivu mak atu kria demanda merkadu ne’ebé fiksu ba grupu produtor sira.

"Governu iha planu atu kolabora ho Ministériu Edukasaun hodi asegura katak programa Merenda Eskolár sosa direta produtu husi organizasaun juventude sira-ne’e. Ita hakarak asegura merkadu ida serteza ba ikan, modo, no manu ne’ebé prodús iha rai-laran, tanba labarik sira presiza han loron-loron," dehan Diretór Jerál David.

Nia mós fó hanoin ba grupu sira atu kria jestaun ne’ebé transparente hodi garante sustentabilidade ba negósiu ne’ebé sira hala’o.

Iha fatin hanesan, Reprezentante UNICEF, Patrizia Di Giovanni, hato’o ninia apresiasaun ba dedikasaun grupu juventude sira-nian maske enfrenta dezafiu oioin.

"Ha’u apresia tebes ho imi-nia esforsu tanba imi hahú etapa por etapa no kontinua hatudu progresu. Labele lakon vontade, maibé kontinua nafatin ho espíritu 'nei-neik maibé bei-beik' hodi alkansa susesu," tenik Patrizia Di Giovanni.

Vise-Prezidente Asosiasaun Tane Produtu Lokál, Julião Lopes, mós hato’o agradesimentu ba prezensa Governu no UNICEF ne’ebé fó ona apoiu tomak, maske atividade hirak ne’e seidauk to’o iha nível máximu.

Vizita observasaun ne’e mós konta ho partisipasaun husi funsionáriu Sentru Juventude Maliana, ekipa téknika husi UNICEF, no membru asosiasaun sira. Atividade ne’e nu’udar rezultadu husi kooperasaun servisu ne’ebé metin entre MJDAK no UNICEF hodi hametin dezenvolvimentu foin-sa’e sira-nian iha área rurál.

#MídiaMJDAK