DILI, 01 JUÑU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ne'ebé akompaña husi Sua Exelénsia Sekretáriu Estadu Arte no Kultura (SEAK), Jorge Soares Cristóvão, husu superior no funsionáriu sira atu fó atensaun ba planu no programa ministeriál sira, hodi garantia implementasaun programa Governu nian bele la'o ho efetivu no fó benefísiu ba povu.

Mensajen ne'e hato'o durante serimónia Isar Bandeira inísiu fulan Juñu 2026 ne'ebé realiza iha resintu MJDAK, Lecidere, Dili. Serimónia ne'e partisipa husi Diretór Jerál, Diretór Nasionál, Xefi Gabinete MJDAK no SEAK, no funsionáriu sira husi ministériu.

Iha ninia diskursu, Ministru Nelyo Isaac Sarmento hateten: "Ita nia atividade balu seidauk atinje alvu ne'ebé ita hakarak. Tanba ne'e, presiza fó atensaun tan ba planu no programa ne'ebé ita halo hodi hasa'e produtividade servisu no orienta servisu ba funsionáriu sira ho di'ak atu bele alkansa programa ministeriál sira."

Puntu importante sira husi serimónia ne'e: Hasa'e produtividade servisu hodi alkansa metas no programa ministeriál sira; Hametin papel superior sira iha orientasaun no akompanhamentu servisu ba funsionáriu sira; Halo jestaun orsamentu ho efisiénsia tanba iha reduzaun orsamentu tinan 2026; Realiza reavaliasaun ba planu no programa ministeriál sira hodi asegura ezekusaun servisu ne'ebé efetivu.

MJDAK reafirma kompromisu atu kontinua implementa programa sira ho dedikasaun no responsabilidade, hodi asegura katka servisu publiku ne'ebé di'ak sei kontinua fó benefísiu ba juventude, desportu, arte no kultura iha Timor-Leste.

#MediaMjdak