Aileu, 12 Novembru 2025 – Selebrasaun Loron Nasionál Juventude (LNJ) ba Dala XX iha Munisípiu Aileu hetan onra boot ho Prezensa S.E. Prezidente Repúblika (PR), Dr. José Ramos Horta, hamutuk ho S.E. Ministru MJDAK, Sr. Nelyo Isaac Sarmento, iha Suku Aiserimou. Atividade ne'e sai fatin hodi fó vizaun Estadu nian ba dezenvolvimentu Juventude no futuru nasionál.

Apelu Krítiku: Estuda Maka'as Hodi Hakat Liu Memória

Iha ninia intervensaun, S.E. Prezidente Repúblika fó fokus ba valór edukasaun, hodi hanoin-hikas esforsu jerasaun Luta nian:

"Ba imi estudante joven sira... imi tenki haka'as aan estuda buka referénsia hodi estuda, tanba futuru pertense de'it ba ema hirak ne'ebé estuda."

PR Ramos Horta subliña katak uluk joven sira esforsu ho fiar no prinsipiu hodi lori Timor-Leste ba Referendu. Ohin loron, luta ne'e troka ba esforsu edukasaun nian hodi lori nasaun ba dezenvolvimentu.

Faktu Ekonómiku no Kriteria ASEAN

Aman ba Nasaun ne'e mós fó klaresimentu kona-ba dezenvolvimentu nasionál ne'ebé liga ho vizaun atu tama ASEAN:

ASEAN: PR hatete katak kriteria importante rua (2) atu tama ASEAN mak Seguransa (ne'ebé Timor-Leste nia rangking di'ak tebes) no Kultura (tanba kontribuisaun intersetorál).

Dezempregu: Dadus hatudu katak dezempregu Juventude iha 5%, ne'ebé fó korajen ba setór hotu-hotu atu kontinua esforsu.

Oportunidade Futuru no Estaleiru Navál Manatutu

Prezidente Repúblika fó informasaun krítiku kona-ba investimentu Estratéjiku ba futuru Juventude nian:

Aseesu Eletrisidade: Dadauk kuaze 98% eletrisidade asesu ona iha territóriu nasionál tomak, inklui liña internet mós, hodi fasilita estuda.

Kampu Servisu Manatutu: Iha tinan 2026, fabrika Estaleiru Navál hosi Japaun konfirmadu harii iha Postu Administrativu Laleia, Munisípiu Manatutu. Estaleiru ne'e sei fó kampu servisu ba ema Timor-oan kuaze 4.000 (mil) ema.

Prezensa hamutuk entre PR, Ministru MJDAK, no Lideransa Estadu seluk iha Aileu, hamutuk ho parseiru internasionál (UNICEF, UNFPA, Plan International), hatudu katak edukasaun no dezenvolvimentu Juventude nian nu'udar prioridade nasionál.

#MídiaMJDAK