DÍLI, 03 Fevereiru 2026 – Governu Timor-Leste hamutuk ho Repúblika Koreia, liuhosi Korea International Cooperation Agency (KOICA), ofisialmente inagura Korea-Timor Leste Friendship Sport Center iha Becora, Tersa ne'e. Serimónia ne'e sai marka importante ba kooperasaun bilaterál nasaun rua nian iha dezenvolvimentu desportu no kbiit juventude nian.

Primeiru-Ministru (PM), Sua Exelénsia Kay Rala Xanana Gusmão, iha ninia diskursu hato’o gratidaun kle’an ba apoiu solidáriu hosi KOICA. PM Xanana subliña katak desportu mak instrumentu estratéjiku hodi harii dame no disiplina.

“Desportu la’ós de’it kona-ba manán ka lakon, maibé dalan ida atu forma karakter labarik sira no hadi'a sosiedade ho dame,” dehan PM Xanana. Xefe Governu mós fó orientasaun ba MJDAK atu dezenvolve programa akademia ne’ebé di’ak hodi prepara jogadór profisionál sira hosi baze.

Iha fatin hanesan, Prezidente KOICA, Sua Exelénsia Chang Won Sam, hato’o ninia haksolok ba prezensa PM Xanana nian. Nia afirma katak kampu foun ne’e sei sai sentru akademia futeból ida hodi dudu disiplina labarik sira-nian.

“Objetivu boot liután mak Korea no Timor-Leste fahe esperiénsia nu’udar parseiru di’ak. Ha’u mós mai monitoriza projetu KOICA nian sira seluk no buka oportunidade foun ba kooperasaun iha futuru oin mai,” dehan Prezidente KOICA.

Serimónia ne’e mós hetan akompañamentu hosi Ministru Juventude, Desportu, Arte no Kultura (MJDAK), S.E Nelyo Isaac Sarmento, no partisipa hosi koadru diresaun MJDAK, reprezentaun KOICA, no autoridade lokál sira. PM Xanana mós apela ba komunidade Becora atu tau matan ba fasilidade ne’e ho responsabilidade.

#Mídia MJDAK