COVALIMA, 7 Outubru 2025 – Ho antuziazmu no espíritu desportivu, modalidade Basketebol Mane iha eventu prestijiozu Fronteira Cup 2025 hahú ona ofisiálmente iha Kampu Seran Kote, Munisípiu Covalima. Jogu abertura ne'e hatudu duni asaun ne'ebé intensa hodi harame públiku ne'ebé asiste.

Vitória Klaru Bobonaru nian

Iha jogu abertura ne'e, ekipa Bobonaru hatudu dominasaun ne'ebé klaru, hodi konsege manán ekipa uma-na'in Covalima A ho eskor finál 31–15.

Kapitaun Ekipa Bobonaru, David João Pereira, espresa ninia kontentamentu ho vitória ne'e, maski nia rekoñese katak sira-nia preparasaun la másimu. Vitória ne'e hatudu duni katak Munisípiu Bobonaru iha poténsia ne'ebé boot iha desportu Basketebol.

Apelu ba Melloria Kualidade Jogu no Infraestrutura

Bazeia ba kualidade jogu, Kapitaun David João Pereira aproveita oportunidade ne'e hodi hato'o apelu importante ida ne'ebé dirije ba organizadór sira. Nia husu atu:

"Ba futuru, se bele, joga Basketebol iha salaun laran (indoor), la'ós iha liur. Ida ne'e importante hodi asegura kualidade jogu ne'e, liu-liu ba jogu ne'ebé iha karáter rejionál hanesan Fronteira Cup."

Apelu ne'e fó hanoin ba Ministériu Juventude, Desportu, Arte no Kultura (MJDAK) kona-ba nesesidade urjente atu investe iha melloria infraestrutura desportiva (indoor) hodi bele atinje padraun kualidade ne'ebé as liután ba kompetisaun nasionál no rejionál sira.

MJDAK afirma katak espíritu amizade no unidade la'o hela iha Fronteira Cup, no komprometidu atu tau atensaun ba dezafiu sira-ne'e hodi dezenvolve atleta no desportu nasionál.

#MídiaMJDAK