DILI, 20 Setembru 2025 — Ministériu Juventude, Desportu, Arte no Kultura (MJDAK), liuhosi Diresaun Nasionál Desportu, ohin ensera atividade Youth Camp 2025 iha kampu futeból Becora. Serimónia enseramentu ne'e reprezenta husi Xefe Departamentu Desportu, Josefina Pinto.

Edukasaun Karakter liuhosi Desportu

Iha ninia intervensaun, Xefe Departamentu Josefina Pinto hateten katak programa ne'ebé hala'o iha Youth Camp, ne'ebé kolabora ho PMC, hanesan parte importante ida husi estudante sira-nia servisu rasik, atu bele aprofunda sira-nia koñesimentu iha área desportu.

Nia subliña katak desportu la'ós de'it kona-ba iha abilidade fíziku, maibé mós kona-ba karakter no etika. "Ita bele joga di'ak, maibé se ita la respeitu ita-nia adversáriu, treinadór, mentór, no árbitru, ita sei la vale buat ida," dehan nia.

Pinto hateten katak Youth Camp ne'e la'ós de'it hanorin pasa bola, maibé mós fornese koñesimentu oi-oin ne'ebé joven sira bele aplika iha sira-nia vida loroloron.

Oportunidade no Vizaun ba Atleta Futuru

Xefe Departamentu Desportu dehan katak Timor-Leste presiza joven ne'ebé matenek iha desportu. Nia temi katak Jogu CPLP ne'ebé foin lalais Timor-Leste sai uma-na'in, nu'udar motivasaun ida ba joven sira.

Nia apela ba partisipante sira ne'ebé hetan oportunidade atu aprende ho didi'ak, tanba disiplina no abilidade mak xave atu sai atleta ne'ebé di'ak iha futuru. "Iha jogu nia laran, se laiha kooperasaun, ekipa sei hetan derota totál," nia hatutan.

#MídiaMJDAK