DILI, 31 Jullu 2025 – Membru Parlamentu Foin-sa'e Nian (PFN) hamutuk na'in-atus-ida -ha'at nulu (140) partisipa ona iha plenária dahuluk ba períodu kinta (V) 2024–2026. Atividade importante ne'e hala'o iha Salaun Ministériu Solidariedade Sosiál no Inkluzaun (MSSI), Kaikoli.

Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hato'o liafuan inspiradora ba joven sira. Nia enfatiza katak:

"Hanesan joven futuru nasaun nian, tenke buka aprende no prepara aan hasa’e kuñesimentu hodi la’o tuir eroi sira-nia ain-fatin ho firme iha prinsípiu atu lori nasaun ba oin."

Dezafiu Teknolojia no Unidade Nasionál

Ministru Nelyo mós bolu atensaun ba Membru PFN sira kona-ba dezafiu foun iha era dijitál nian. Nia husu ba sira atu:

• La bele sai atan ba Média Sosiál no Artificial Intelligence (AI): Presiza prepara an didi'ak atu la lakon rasiosíniu no prinsípiu rasik.
• Hametin Unidade Nasionál: Kontinua fahe saida mak sira aprende ba maluk sira iha munisípiu no postu administrativu sira, hodi hametin unidade nasionál.

Prezensa PFN nian ne'e hanesan pasu importante ida ba dezenvolvimentu lideransa joven nian iha Timor-Leste.

Partisipa iha atividade ne'e mós Diretór Jerál Juventude (DJJ) MJDAK nian, Provedór Direitus Umanus no Justisa (PDHJ), no Prezidente no membru Konsellu Nasionál Juventude Timor-Leste (CNJTL) sira.

#MídiaMJDAK