DILI, 8 JANEIRU 2026 (GCI-MJDAK) – Diretora-Jerál Servisu Korporativu Ministériu Juventude, Desportu, Arte no Kultura (MJDAK), Isabel Adalziza Fátima R.Ferreira, hamutuk ho Xefe Gabinete MJDAK, Egas Baros Guterres Godinho, partisipa iha sorumutu diseminasaun Dekretu-Lei Ezekusaun no Distribuisaun Orsamentu nian.

Iha sorumutu ne’ebé hala’o iha Auditóriu Ministériu Finansas, Aitarak-Laran, dirijente sira mós akompaña husi Diretór Nasionál Jestaun Finansas, Guido Monteiro, no Koordenadór Unidade Aprovizionamentu MJDAK, Germenino Barreto de Jesus.

Objetivu husi sorumutu ne'e mak atu disemina regras no prosedimentu sira husi Dekretu-Lei ba regulamentasaun Lei Enkuadramentu Orsamentál (LEO), ezekusaun Orsamentu Jerál Estadu (OGE) 2026, no mós kestaun aprovizionamentu nian ba liña ministériu sira hotu.

Diseminasaun ne’e kobre mós sirkulár avizu autorizasaun despeza no kontrolu orsamentál ba jestór sira iha área jestaun finansas públikas, inklui entrega orsamentu aprovadu 2026 no lansamentu sistema Government Resource Planning (GRP).

Atividade ne’e importante tebes hodi asegura katak implementasaun OGE 2026, ne’ebé hahú husi Janeiru to’o Dezembru, bele la’o ho transparénsia tuir kriteria legál ne’ebé publika ona iha Jornál da Repúblika.

Iha biban ne'e, Primeiru-Ministru Kay Rala Xanana Gusmão, akompaña husi Ministra Finansas, lansa ofisialmente Portál e-Procurement foun hodi hametin kridibilidade iha kestaun kompra públika nian.

Sorumutu ne’e hala’o durante loron rua, hahú husi loron 8 to'o 9 Janeiru 2026, hodi fásilita entidade orsamentál sira prepara an antes sistema jestaun informátika finanseira loke ba ezekusaun.

#MídiaMJDAK