DILI, 12 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ensera ofisiálmente jogu futsal Amo Papa Cup ne'ebé hala'o iha Tasi-Tolu. Eventu ne’e foin daudaun realiza iha Aldeia 12 de Outubru.

Iha serimónia enseramentu ne'e, Ministru Nelyo Isaac Sarmento fó mensajen importante ba joven no inan-aman sira, hodi reafirma katak Governu nafatin apoia ba atividade saida de'it mak joven sira kria hodi hametin pás no unidade.

Mensajen Istóriku ba Juventude

Ministru Nelyo Isaac Sarmento subliña parabéns ba inisiativa Amo Papa Cup ne’e hodi halibur joven sira iha fatin istóriku Tasi-Tolu. Nia dehan, fatin ne'e lori mensajen importante rua husi Amo Papa na’in-rua ne'ebé vizita ona Timor-Leste:

1. Amo Papa João Paulo II: Nia husu ba sarani Timoroan tomak, "imi mak masin, ho ida ne'e imi tenke mer nafatin ba ema hotu."
2. Amo Papa Francisco: Nia hatete, "imi nia hamnasa ne'e mak sai furak tebes ba mundu hotu, maibé imi tenke kuidadu ba lafaek sira ne'e mai iha imi nia rain."

Bazeia ba mensajen ne'e, Ministru apela ba joven sira: "Ohin loron ita kontente, maibé ita mós tenke hatene buat ki'ik ka boot ne'ebé sempre iha ita-nia leet hodi estraga ita-nia amizade iha ita-nia aldeia. Imi tenke nafatin kria uniaun liu husi jogu futsal ne'e hodi hametin duni dame iha bairu ida ne'e."

Ministru husu ba joven sira iha bairu ne'e atu kontinua organiza kompetisaun ne’e tinan-tinan, la'ós de'it ba ema boot sira, maibé ba mós labarik ki’ikoan sira hotu.

Apoiu Governu ba Inisiativa Joven

Ministru Isaac Sarmento fó fiar ba komisaun organizadora katak tinan oin sira bele organiza la'ós de'it futsal, maibé ba mós kompetisaun múzika nian.

"Governu, liuhusi Ministériu ida ne'e, iha imi-nia kotuk atu imi kontinua nafatin realiza programa sira ne'e ba oin," nia afirma.

Nia dignifika ba joven sira: "uluk imi mak abertura, ohin imi mak finál nafatin, entaun manán kontente ba, lakon lalika laran susar, prepara an nafatin hodi tinan oin imi kontinua nafatin."

Prezidente Komisaun Organizadora, André Aura F. Alves, hatete katak atividade ne'e selebra vizita Amo Papa Francisco nian iha Setembru tinan kotuk liu-ba, no mós selebra aniversáriu aldeia nian ne'ebé hetan vizita husi Sua Santidade Papa João Paulo II iha tinan 1989.

André Aura hatutan katak parte Governu, liuhusi MJDAK, apoia orsamentu hamutuk USD $2,300.00 hodi asegura susesu ba eventu ne'e.

#MídiaMJDAK