Aileu, 12 Novembru 2025 – Juventude Sobrevivente Masakre Santa Cruz 12 Novembru 1991, Sr. Miguel Costa Lay Mendonça, hato'o mensajen forsa no morál ba joven Timor-oan tomak hodi partisipa iha atividade Kalan Reflesaun ba selebrasaun Loron Nasionál Juventude ba Dala XX. Atividade ne'e hala'o iha Munisípiu Aileu Vila.

Apelu Luta Hasoru Aan Rasik

Iha ninia intervensaun, Sr. Miguel Lay husu ba jerasaun foun atu aprende hosi pasadu no foka iha sakrifísiu ba futuru nasionál.

"Joven Timor oan ohin Loron tenki luta hasoru aan rasik no egoísmu," dehan Sr. Miguel Lay. "Ami hamrik iha ne'e hodi sai sasin no kontinua motiva imi. Laos de’it ne’e, joven sira la bele haluha ba igreja tanba uluk iha tempu susar igreja mak fó protesaun maka'as mai ami."

Nia subliña katak ohin loron Timor-Leste ukun-aan ona, joven sira tenke halo sakrifísiu foun: estuda maka'as no badinas hodi lori rai ida-ne'e ba di'ak no hadomi povu tomak.

Partisipasaun Lideransa MJDAK

Atividade kalan reflesaun ne'e hetan partisipasaun másimu hosi lideransa MJDAK nian, hodi hatudu kompromisu Ministériu atu hametin ligasaun entre Memória no Esperansa.

Partisipa iha ne'ebá mak: Diretór Jerál Juventude (DJJ), Sr. David Tomás de Deus, Kordenadora Gabinete Komunikasaun no Informasaun (GKI), Sra. Aida de Jesus Soares, Hamutuk ho Diretór Nasionál no Xefe Departamentu sira hotu, inklui ekipa MJDAK, Komunidade Aileu no Juventude Hadomi Natureza.

Prezensa sobrevivente 12 Novembru ne'e nu'udar pontu importante iha Loron Nasionál Juventude nian, hodi reforsa subtema “Husi Santa Cruz ba Aileu – Husi Memória ba Esperansa”.

#MídiaMJDAK