MISSA SOLENE AILEU: HOMILIA LIGA LIVRU SABEDORIA NO EVANJELLU LUCAS BA KNAAR JUVENTUDE NO LIDERANSA ESTADU

Aileu, 12 Novembru 2025 – Komemorasaun Loron Nasionál Juventude (LNJ) ba Dala XX no Masakre Santa Cruz ba Dala XXXIV iha Munisípiu Aileu hahú ho Missa Solene, ne'ebé Prezide husi Amu Vigáriu Diosezanu, Pe. Carlito Teti Laca, iha Igreja Parókia São Paulo São Pedro Aileu. Homilia ne'e sai momentu kle'an atu liga Liturjia loron 12 Novembru nian ho valór Memória, Lideransa, no Gratidun Nasionál.

Sabedoria 6: Apelu ba Justisa no Responsabilidade

Bazeia ba Leitura I (Livru Sabedoria 6, 1–11), ne'ebé fó avizu ba governante sira atu halo justisa no haktuir Maromak nia hakarak, Amu Vigáriu liga valór ne'e ba knaar Lideransa Estadu (inklui Lideransa MJDAK) no Juventude iha dezenvolvimentu nasionál:

"Leitura hosi Sabedoria ohin loron nian nu'udar hanorin kle'an katak, poder ne'ebé ita hetan, Maromak mak fó. Nunee, ita hotu, iha pozisaun governu ka lideransa komunidade nian, tenke uza hodi 'halo justisa ba indefesu' (hanesan Salmu 81 apela). Luta naruk agora mak liberta nasaun hosi kiak no ignoránsia."

Mensajen ne'e hametin Prezensa Ekipa MJDAK nian iha Aileu, atu hahú rotasaun dezenvolvimentu hosi baze.

Lucas 17: Fiar, Gratidun, no Kompromisu ba Luta

Puntu krítiku iha homilia ne'e foka ba Evanjellu São Lucas 17, 11–19 (Istória Lepra Na'in Sanulu):

Gratidun ba Libertasaun: Amu Vigáriu dehan katak Timor-Leste nu'udar povu ne'ebé hetan kura (liberdade) liuhosi ran asuwa'in sira. Nia apela hodi husu: "Iha lepra na'in sanulu (10), na'in ida (1) de'it mak fila mai agradese; ita Timor-oan, ita na'in hira mak fila hodi agradese ba Maromak no erói sira-nia sakrifísiu?"

Kompromisu Asuwa'in: Nia apela ba Juventude atu labele sai hanesan na'in sia (9) ne'ebé haluha. Maibé, tenke hanesan ida (1) ne'ebé hatudu fiar no kompromisu hodi harii Dame no Pás atu kontinua luta naruk ne'ebé erói sira husik hela.

Sasin Unidade Nasionál

Partisipasaun ativu hosi Diretór Jerál no Ekipa MJDAK hamutuk ho Sobrevivente 12 Novembru iha Missa Solene ne'e hatudu katak asuntu Nasionál no Fé sira-nian la bele fahe malu. Missa ne'e sai baze espirituál ba subtema MJDAK nian: “Husi Santa Cruz ba Aileu – Husi Memória ba Esperansa”.

#MídiaMJDAK