DÍLI, 22 JUÑU 2026 – Ministériu Juventude, Desportu, Arte no Kultura (MJDAK), liuhusi Direção Jerál Juventude (DJD), hamutuk ho UNFPA, hala'o formasaun ba formador (Training of Trainers - T.o.T) husi jestor sentru juventude sira hamutuk 25. Atividade ne'e realiza iha Salaun Uma Nahe Biti Boot MJDAK, Lecidere, Dili, ho objetivu atu reforsa kapasidade formador sira iha área relasaun saudavel ba joven sira.

Iha sesaun abertura, Diretor Jerál Juventude, Mario Tilman, hatete katak nia hakarak kongratula ba UNFPA ne'ebé tulun tebes nasaun Timor-Leste iha parte fó solusaun ba joven sira iha área saúde, liuliu ba relasaun saudavel, hodi prevene joven sira husi isin rua sedu no kaben sedu.

"Guvernu Timor-Leste liuhusi MJDAK agradese tebes ba UNFPA nia komitmentu ne'ebé makas. Informasaun no formasaun relasaun saudavel ne'e la'ós naton ba atividade eventual sira, maibé hetan apoiu kontínuu husi UNFPA durante hala'o formasaun sira iha munisípiu sira," dehan Mario Tilman.

Nia mós hatete katak Ministériu prefere ba fundu operasionál ba sentru juventude sira, ne'ebé konsidera atividade regulár ba sentru juventude sira nian. Relasaun saudavel ne'e mós ladun hetan husi organizasaun juventude sira seluk, tanba akumula ona atividade regulár sentru juventude nian.

"Formasaun relasaun saudavel ne'e parte ida ne'ebé fó ba sentru juventude sira atu fó formasaun ba joven sira. Nafatin informa ba kolega sira katak aproveita semana ida ne'e hodi intende didiak ba matéria ne'ebé fó husi UNFPA," nia hatutan.

Reprezentante UNFPA iha Timor-Leste, Sra. Navcha Suren, hatete katak UNFPA ho MJDAK hala'o programa kona-ba relasaun saudavel besik tinan ha'at ka lima, no treinu formadores sira besik atus ida resin ona. Durante ne'e, halo roll out iha ida-idak nia munisípiu sira durante tinan ha'at ka lima nia laran.

"Ohin ne'e to'o loron lima, UNFPA konvida fila fali formadores sira hodi hamutuk ho MJDAK atu refresing out roll, hodi hare fila fali sira nia esperiénsia durante hala'o iha ida-idak nia munisípiu sira no obstákulu saida deit mak akontese durante formasaun," esplika Sra. Navcha Suren.

Nia mós informa katak durante formasaun loron lima ne'e, sei hare liu ba informasaun foun ne'ebé formador sira infrenta, no UNFPA ho MJDAK sei fó resposta ba problema sira no aumenta informasaun foun ba formadores sira.

"Agradese teb-tebes tanba formasaun ida ne'e ne'ebé sai ona formasaun regular iha sentru juventude sira iha munisípiu hotu-hotu. Sentru juventude sira bele hala'o sira-nia formasaun regulár kona-ba relasaun saudavel. MJDAK sei kontinua fó formasaun ne'e ba joven sira no espande liután hodi akumula joven barak liután iha tempu tuir mai, atu bele benefisia ba programa relasaun saudavel refere," dehan Sra. Navcha Suren.

Partisipa iha atividade ne'e mai husi funsionáriu MJDAK no pontu Vogal MJDAK nian iha munisípiu 13 nian.

MJDAK no UNFPA kontinua komprometidu atu hametin kooperasaun hodi fó formasaun ne'ebé di'ak ba joven sira, hodi prepara sira ba futuru ho saúde, inteligénsia, no matenek.

#MediaMjdak