DILI, 12 JANEIRU 2026 (GCI-MJDAK) – Ministériu Juventude, Desportu, Arte no Kultura (MJDAK), liuhosi Gabinete Komunikasaun no Imprensa (GCI), hato’o ba públiku katak dezempeñu tinan fiskál 2025 nian atinji susésu signifikativu ho taxa ezekusaun orsamentu 98,1% bazeia ba dadus Portál Transparénsia Governu nian.

Rezultadu ne’ebé aas ne’e sai hanesan baze fundamentál hodi dudu planeamentu MJDAK nian ba tinan 2026 ho kridibilidade ne’ebé boot liután, hodi implementa vizaun "Mudansa Radikál" ne’ebé Sua Ekselénsia Ministru Nelyo Isaac Sarmento anunsia ona.

Iha tinan 2025, MJDAK ho totál alokasaun $ 11.899.586,52 konsege ezekuta programa sira ho efisiénsia aas. Relatóriu internu SIPMARE mós konfirma ezekusaun fíziku no finanseiru hamutuk 96,33%, ne’ebé refleta kordenasaun di’ak entre diresaun sira hotu.

Ministru Nelyo Isaac Sarmento (NIS) emfatiza katak kapasidade kordenasaun ne’e mak xave prinsipál. "Ita-nia meta mak uza osan Estadu nian ho responsabilidade hodi dudu programa juventude, desportu, no kultura ba oin," afirma Ministru NIS.

Pontu Prinsipál Dezempeñu 2025:

·       Bem-estar Funsionáriu: MJDAK kumpri 100% pagamentu ba Saláriu no Vantajen ba funsionáriu na’in 600, inklui Désimu Terseiru.

·       Impaktu Sosiál ba Juventude: Konsege fó formasaun ba juventude na’in 5.861, ultrapasa meta inisiál na’in 850.

·       Desportu ba Povu: Partisipasaun populasaun iha desportu komunitáriu atinji ema na’in 16.010.

·       Kultura no Identidade: Rejista ona item patrimóniu kulturál hamutuk 83 hodi hametin identidade nasionál.

Maske nune'e, MJDAK rekoñese dezafiu iha ezekusaun infraestrutura, hanesan Kampu Multifunsoens Taibessi ne’ebé atinji 56,10%. Iha tinan 2026, Ministériu sei foka ba digitalizasaun administrativu (GRP & e-Procurement), efisiénsia orsamentu, no modernizasaun jestaun hodi dudu desportu profisionál.

#MídiaMJDAK