Dili, 14 Jullu 2026 – Ministériu Juventude, Desportu, Arte no Kultura (MJDAK), liu husi Xefi Departamentu Infraestrutura, Paulo Amaral, hamutuk ho ekipa teknika ministeriu nian, halo vizita observasaun ba kampu multifunsaun iha Taibesi, Dili. Vizita ida ne'e objetivu atu avalia progresu obra no verifika kumprimentu ho prazu estensaun fulan rua (Jullu–Agostu 2026) ne'ebé fó ona ba Kompania Rocky Construction, Lda tuir desizaun MJDAK iha loron 1 Jullu 2026.

Iha vizita ne'e, Enjineiru Edwin husi Rocky Construction Lda hateten katak sira tenta aprezenta proposta atu estende prazu, ho estimativa progresu sei 15% ne'ebé sei kompleta. Nia mós rekoñese katak kompania daudaun sei hein pagamentu ba númeru 5, no traballadór sira seidauk simu pagamentu, ne'ebé rezulta ba situasaun sira la servisu. Kompania ne'e iha traballadór hamutuk ema nain 10 to’o 14 resin.

“Primeiru, ita tenke selu ita nia traballadór sira ba fulan rua ho balun liubá. Entaun, ami hein no reza de'it ba buat di'ak liu ba traballadór sira ne'e no ami nia empreza,” deklara Enjineiru Edwin.

Tuir orientasaun MJDAK iha loron 1 Jullu, Rocky Construction tenke hato'o karta justifikasaun formal ba Ministru Juventude, Desportu, Arte no Kultura, Exelensia Nelyo Isaac Sarmento, kona-ba atrasu implementasaun projetu. Justifikasaun ne'e sei sai baze ba ministériu atu foti desizaun tuir lei no prosedimentu administrativu.

MJDAK kontinua kometidu atu asegura katak projetu infraestrutura governu sira implementa ho transparénsia, responsabilidade no kumprimentu kontratual, atu garante rezultadu ne'ebé di'ak ba juventude no povu Timor-Leste.

#MediaMjdak