DILI, 26 Jullu 2025 – Dili Capital ne'ebé furak no hakmatek prontu ona atu simu delegasaun alta nivel sira hodi hala'o XVI Konferénsia Ministru Juventude no Desportu CPLP nian. Reuniaun importante ida ne'e sei hala'o iha loron 27 Jullu 2025, hahú husi tuku 09:00 dader iha Hotel JL World.

Konferénsia ne'e nu'udar eventu estratéjiku ida hodi hametin kooperasaun, dezenvolvimentu polítika juventude no desportu nian iha Komunidade nasaun sira ne'ebé ko'alia lian Portugés (CPLP).

Lideransa Lusófona Hamutuk iha Dili

Timor-Leste, nu'udar país uma-na'in, simu ona ho laran ksolok prezensa husi Ministru no Ministra importante sira:

1. S. Exa. Sra. Margarida Balselheiro Lopes, Ministra Kultura, Juventude no Desportu husi Portugál.
2. S. Exa. Eng.º Rui Falcão Pinto de Andrade, Ministru Juventude no Desportu Angola nian no Prezidente atuál Konferénsia Ministru Juventude no Desportu CPLP nian.
3. S. Exa. Dr. Celso Vaz Do Nascimento Matos, Ministru Saúde no Desportu husi São Tomé e Príncipe.
4. S. Exa. Sr. Nelyo Isaac Sarmento, Ministru Juventude, Desportu, Arte no Kultura (MJDAK) Timor-Leste nian, ne'ebé sei lidera konferénsia nu'udar Ministru husi país uma-na'in.

Ministru sira husi Brazíl, Cabo Verde, Giné-Bisau, Giné Ekuatoriál, no Moçambique mós sei partisipa.

Ajenda Foka ba Dezenvolvimentu Juventude

Ajenda ba konferénsia ne'e nakonu ho tópiku importante sira ne'ebé atu orienta polítika ba tinan oin mai, inklui:

• Polítika Juventude no Desportu nian.
• Étika Desportiva no Anti-Dopajem.
• Planu Asaun Juventude ba tinan 2026-2036.
• Proposta Deklarasaun Finál kona-ba Integridade no Desportu.
• Planu ba Jogos CPLP tuir mai iha Brazíl (2027).

Momentu Istóriku: Prezidensia CPLP ba Timor-Leste

Konferénsia ne'e marca momentu Istóriku ida tanba Prezidensia CPLP sei Transmite husi Angola ba Timor-Leste! Ida ne'e hanesan pasu signifikativu ba kooperasaun no dezenvolvimentu juventude no desportu iha Komunidade, hodi fó oportunidade ba Timor-Leste atu fó kontribuisaun ba vizaun CPLP nian.

MJDAK konvida públiku tomak hodi akompaña notísia hodi hetan atualizasaun direta husi konferénsia ne'ebé sei hala'o iha aban.

#MídiaMJDAK