COVALIMA, 6 Outubru 2025 – Jogu Abertura ba modalidade Futebol iha eventu prestijiozu Fronteira Cup 2025 hala'o ho susesu boot iha Kampu Futebol Salele, Munisípiu Covalima. Atividade desportiva ne'e hahú ofisiálmente iha loron 6 Outubru 2025.

Komunidade Salele tomak hatudu sira-nia antuziazmu másimu, hodi halo prezensa maka'as iha kampu laran atu asiste kompetisaun ne'ebé intensa. Jogu dahuluk ne'e hatudu duni espíritu fair play no valór hamutuk liuhusi desportu.

Rezultadu Jogu Abertura

Jogu abertura ne'e halibur ekipa uma-na'in rua: Covalima A hasoru Covalima D. Iha jogu ne'ebé nakonu ho atake no defende, ekipa Covalima A konsege manán ekipa adversáriu ho eskor finál 3–0.

Apelu ba Melloria no Dezenvolvimentu

Hafoin jogu, Kapitaun Ekipa Covalima A, Bartolomeu Filipe Amaral, hato'o agradesimentu ba Ministériu Juventude, Desportu, Arte no Kultura (MJDAK) no Parseiru Administrasaun Munisipál Covalima (PAMC) ba organizasaun.

Maibé, Bartolomeu Filipe Amaral hato'o mós apelu importante ida ne'ebé dirije ba Melloria Infraestrutura Desportiva:

"Ha'u husu ba PAMC no mós ba Federasaun Futeból Timor-Leste (FFTL) atu tau matan ba Kampu Futebol Salele nian, tanba kondisaun kampu ne'e ladun sufisiente ba jogadór sira ne'ebé iha poténsia boot. Maski iha limitasaun, ami-nia espíritu luta atu hetan kampion kontinua nafatin!"

MJDAK komprometidu atu apoia nafatin atleta sira-nian luta, no sei tau atensaun ba apelu husi atleta sira kona-ba melloria infraestrutura desportiva hodi bele dezenvolve kualidade desportu iha baze.

#MídiaMJDAK