Dili, 18 Novembru 2025 – Iha enkontru “Café Hamutuk ho Média” ne’ebé Gabineti Komunikasaun no Informasaun (GCI) organiza, Diresaun Jerál Servisu Korporativu (DJSK) hatudu katak sira nia knaar Pilár ne’ebé sustenta dezenvolvimentu nasionál, hodi liga orsamentu ho rezultadu kle'an. DJSK hatudu oinsá sira nia ezekusaun la'ós de'it taxa, maibé investimentu estratéjiku ba futuru nasaun nian.

Iha finál tinan, jestaun orsamentu MJDAC nian hatudu rezultadu signifikativu. Orsamentu MJDAC nian sa’e ba $11.8 Miliaun, tanba simu fundus adisionál $2.4 Miliaun hosi FOG hodi finasia Jogu CPLP 2025.

Diretór DNGF, Guido Monteiro, esplika katak jestaun ba orsamentu adisional iha planu ne’e presiza responsabilidade boot.

Guido Monteiro: "Ami garante ho dezeñu ne'ebé lós ba Portál Transparénsia Governu nian. Ami nia kompromisu mak atu ezekusaun ne’e, ne’ebé atinji ona liu 80% to'o Outubru, bele liu 95% to'o Dezembru, inklui obligasaun."

Osan ne'ebé DNGF jere ne'e tau kedas iha obra ne’ebé sai prova ba públiku. Diretór DNPLI, Abel de Jesus Andrade, nia relatóriu hatudu oinsá Kapital Dezenvolvimentu transforma fasilidade fíziku:

Dezentralizasaun no Progresu: Estadiu Foun Manatutu kuaze remata ona (95% pagamentu). Projetu ida-ne’e hato’o sinál klaru katak MJDAC foka ba dezenvolvimentu infraestrutura iha Munisípiu sira.

Manutensaun Ativa: DJSK garante katak fasilidade sentrál sira hanesan Kampu Multifunsaun Lecidere, Estadiu Gleno, Estadiu Dili, Sentru Gináziu Dili, no Kampu Becora kontinua fungsiona hodi fó espasu seguru ba joven sira hodi halao sira-nia atividade desportu no prevensaun konflitu.

Diretór DNPC, Anannias Bendito Pinto, fó klarifikasaun krítiku kona-ba oinsá DNPC nia knaar Planeamentu garante investimentu iha fatin ne’ebé lós.

KUALIDADE (Investimentu Direta): MJDAC aloka orsamentu $8,000 ba kada Organizasaun juventude no Sentru Juventude sira atu sustenta atividade no  7+ Formasaun Kualidade (hanesan LSBE, Relasaun Saudavel, Komputadór, Administrasaun & Finansa,  Lian Portugues, Ingles,  Korea no Hospitalidade). Alvu direta ba formasaun kle'an ne'e mak jovem liu 53 benefisiáriu iha kada Sentru.

KUANTIDADE (Impactu Indiréitu): Joven na'in 53+ ne'e sei sai ajente mudansa atu mobiliza sira nia kolega sira. Ida-ne’e mak razaun tanbasá relatóriu SIPMARE hatudu liu 5,000 joven benefisia ona iha kada Munisípiu, hodi hetan exposure ba atividade MJDAC nian.

Anannias Pinto: "Ami nia investimentu iha Líder na’in 53+ ne’e, hodi garante sira hetan kapasidade atu redús konflitu no fahe kbiit ba joven seluk. Orsamentu ne'e investe ba Karater no Lideransa nian."

Relatóriu kle'an ne'e konklui katak MJDAC, liuhusi Diretora Jerál Isabel Adalziza Fatíma Rodrigues Ferreira no ninia diresaun sira, hatudu ona katak jestaun responsavel ba OJE (liu 80% ezekusaun) bele sai instrumentu estratéjiku hodi hari'i infraestrutura no dezenvolve karater joven Timor-Leste nian.

#MídiaMJDAK