DILI, 25 Abríl 2026 (GCI/MJDAC) – Sua Exelénsia Ministru Juventude, Desportu, Arte no Kultura (MJDAC), Nelyo Isaac Sarmento, ofisialmente loke Kampionatu Nasionál Taekwondo Timor-Leste tinan 2026. Eventu desportivu ne’ebé halibur atleta kategoria Júnior no Sénior husi territóriu tomak ne’e, hala’o iha Gináziu Desportu Dili (GDD), sábadu ne’e.

Iha ninia diskursu abertura, Ministru Nelyo Isaac fó agradesimentu espesiál ba inan-aman sira ne’ebé fó apoiu tomak ba sira-nia oan hodi tuir treinu iha klube no dozan sira. Ministru subliña katak Taekwondo nu’udar modalidade estratéjiku ne’ebé fó ona vitória barak ba nasaun liuhusi medalla oioin.

"Ita ko’alia kona-ba herói foun, imi mak herói ba rai ida-ne’e. Taekwondo oferese oportunidade boot hodi hadau medalla osan-mutin barak iha eventu internasionál. Se imi la aproveita oportunidade ne’e hodi serví nasaun, imi lakon boot tebes," dehan Governante ne’e.

Preparasaun ba Kampionatu Internasionál no ASEAN Games

Bainhira ko’alia ba jornalista sira, Ministru MJDAC esplika katak kampionatu nasionál ne’e sai nu’udar meius ida hodi halo selesaun ba atleta sira ne’ebé sei reprezenta Timor-Leste iha kampionatu internasionál iha Mongolia. Alende ne’e, kampionatu ne’e mós nu’udar preparasaun hodi lori atleta Sénior sira ba kompetisaun kualifikasaun ASEAN Games oin mai.

Ministru mós fó motivasaun ba atleta sira ne’ebé sente menus iha kategoria Kyorugi (fighting) atu bele koko fali kategoria Poomsae (arte), nune’e labele lakon sira-nia paisaun ba desportu ne’e. "Lakon ka manan la’ós problema, importante mak imi hatudu imi-nia talentu no koriji an hodi sai di’ak liután," nia reforsa.

Apoiu Governu ba Modalidade Prioritária

Kona-ba sustentabilidade desportu nian, Governante ne’e konfirma katak Governu fó apoiu 100% ba dezenvolvimentu desportu iha rai-laran, kobre kestaun finanseiru, fasilidade treinu, no kapasitasaun ba formadór sira.

Maski nune’e, Ministru rekoñese katak Governu iha limitasaun rekursu, tanba ne’e foka liu ba modalidade prioritária lima (5) ne’ebé iha potensiál boot hodi hetan prestasaun iha nível mundiál, inklui Taekwondo no Karaté. "Estadu fó atensaun másimu ba modalidade ne’ebé bele lori prestasaun ba rai ida-ne’e, maibé la taka dalan ba modalidade seluk hodi dezenvolve sira-nia organizasaun," nia hateten.

Serimónia abertura ne’e hetan mós partisipasaun husi  Embaixadór Japaun iha Timor-Leste, Prezidente Federasaun Taekwondo Timor-Leste (FTTL), kargu xefia MJDAK, no entidade relevante sira seluk.