COVALIMA, 26 Abríl 2026 (GCI/MJDAC) – Ministériu Juventude, Desportu, Arte no Kultura (MJDAC), liuhusi Diresaun Nasionál Asosiativizmu Juventude (DNAJ) hamutuk ho Alumni Parlamentu Foinsa’e Timor-Leste (APFTL), hala’o hela programa Estudu Vizita ba membru PFN Períodu V (2024-2026). Atividade ne’ebé foka ba área fronteira ne’e, kobre Munisípiu Covalima, Bobonaro, no Rejiaun Administrativa Espesiál Oekusi Ambenu (RAEOA).

Ho mandatu ne’ebé hahú husi 2023 to’o 2026, membru PFN hamutuk na’in 121 hala’o identifikasaun ba dezafiu ne’ebé juventude fronteira enfrenta, bazeia ba temátiku prioritáriu lima: Edukasaun, Moris Saudável, Empregu no Empregabilidade, Partisipasaun Sívika, no Krime ho Violénsia.

Munisípiu Covalima: Rezultadu Identifikasaun no Dezafiu iha Terrenu

Iha Munisípiu Covalima, membru PFN na’in 39 hala’o estudu vizita iha Postu Administrativu Tilomar. Iha sorumutu ho autoridade lokál, PNTL-UPF, no Migrasaun, PFN foti dadus kona-ba realidade sosiál ne’ebé akontese iha liña fronteira.

Xefe Suku Beiseuc, Antonio Cardoso, hato’o ninia orgullu ba prezensa PFN nian ne’ebé bele rona lian husi foin-sa’e sira. Maski dezafiu klimátika hanesan udan no estrada ne’ebé aat sai impedimentu ba movimentasaun, membru PFN sira hanesan Andre Soares de Araujo Belo no Rainha Ximenes Viegas Pinto, mantein espíritu voluntarizmu hodi rekolla informasaun kredivel.

Rezultadu husi estudu ne’e aprezenta liuhusi Workshop iha Eskola Katólika São João Paulo II Wetaba. Iha biban ne’e, foin-sa’e lokál Octaviano do Nascimento haktuir onestidade katak, tanba menus kampu traballu, joven barak iha fronteira hili dalan transaksaun ilegál (hanesan fa’an mina) hodi sustenta ekonómia família.

RAEOA: Situasaun Edukasaun iha Postu Nitibe sai Preokupasaun

Iha RAEOA, ekipa PFN ne’ebé lidera husi Xefe Departamentu Apoiu Asosiativizmu Juventude, Paulo Jorge Amaral, hala’o estudu iha Postu Administrativu Nitibe. Sorumutu ho Administradór Postu, Agustinho Fulit, no Xefe Suku Bene-Ufe, Marcos Meni, foka liu ba kestaun abandonu eskolár.

Dadus ne’ebé rekolla iha EBC Baoknana hatudu realidade ne’ebé krusiál:

Abandonu Eskolár: Pursentu 75 estudante la remata eskola tanba kondisaun ekonómika no kazu kaben sedu.

Falta Rekursu: Manorin-na’in ida tenke hanorin matéria haat, no eskola falta livru manuál husi Ministériu Edukasaun.

Kultura no Ekonomia: Foin-sa’e barak hili kaben sedu ka sai ba rai-li’ur liuhusi dalan ilegál hodi buka moris.

Rekomendasaun ba Órganu Soberania

Xefe Seksaun Parlamentu Foinsa’e MJDAC, Cesaltina Camacho Pereira, enfatiza katak atividade estudu vizita ne’e sei kontinua ho Plenária Nasionál iha Dili. Rezultadu hotu ne’ebé PFN rekolla husi Covalima, Bobonaro, no RAEOA sei transformadu ba dokumentu rekomendasaun ofisiál.

"Estadu presiza fó atensaun ba asuntu hirak ne’e. PFN sai hanesan ponte hodi hato’o realidade husi fronteira ba ukun-na’in sira, nune’e bele iha fali desizaun ne’ebé pas hodi hadi’a kualidade moris foin-sa’e nian iha futuru," dehan Cesaltina Camacho.

Atividade ne’e hetan apoiu tomak husi membru APFTL nu’udar parseiru implementadór, hodi asegura katak lian husi foin-sa’e sira mós bele to’o iha nível nasionál.