DILI, 27 Jullu 2025 – Momentu istóriku ida akontese ohin iha Dili! Iha ámbitu XVI Konferénsia Ministru Juventude no Desportu CPLP nian, ne'ebé hala'o hela iha Hotel JL World, Timor-Leste simu ona ofisiálmente Prezidensia ba Konferénsia importante ida-ne'e.

Transmisaun Prezidensia ne'e akontese husi Angola ba Timor-Leste. Ida ne'e marka pasu signifikativu ida ba kooperasaun no dezenvolvimentu juventude no desportu iha Komunidade País ho Lian Portugés (CPLP).

Ministru Nelyo Isaac Sarmento Lidera

Ministru Juventude no Desportu husi Angola, Sua Exelénsia Eng.º Rui Falcão Pinto de Andrade, nu'udar Prezidente atuál ne'ebé termina ona mandatu, entrega simbilikamente prezidensia ba Timor-Leste.

Hafoin ne'e, Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, asume ona kargu nu'udar Prezidente foun ba Konferénsia Ministru Juventude no Desportu CPLP nian.

Ida ne'e hanesan rekoñesimentu ba kompromisu Timor-Leste nian no fó oportunidade ba nasaun atu lidera inisiativa importante sira iha área dezenvolvimentu juventude no desportu nian durante ninia mandatu.

MJDAK afirma katak ida ne'e hanesan kompromisu foun Timor-Leste nian atu kontinua hametin ligasaun, promove interkámbiu, no fó kontribuisaun ba dezenvolvimentu joven sira nian iha família CPLP.

#MídiaMJDAK