Ermera, 05 Dezembru 2025 – Inisiativa konjunta ida entre Ministériu Juventude, Desportu, Arte no Kultura (MJDAK) no Asosiasaun Discovery and Inovation Association (DIA) iha Munisípiu Ermera la’ós de’it hato’o formasaun, maibé kria ona impaktu signifikativu ba joven produtivu na'in 40 atu hasa’e sira-nia kualidade no kompetisaun iha mundu modernu.

Formasaun Literasia Dijitál ne’ebé hala’o iha Laboratóriu ETCI Sunusua, Suku Talimoro, ho objetivu prinsipal atu reforsa dezenvolvimentu foin-sa’e rurál, hatudu katak investimentu iha kbiit dijitál nu'udar xave ba dezenvolvimentu sosiál no ekonómiku lokál.

Transformasaun Abilidade Dijitál

Joven partisipante na’in 40, kompostu hosi feto 23 no mane 17, mai hosi grupu produtivu sira iha Ermera, Hatulia, no Railaku. Sira ne’e aprende uza Google Formuláriu no Canva.

Valor Aumentu: Prezidente DIA, Sr. Januario Soares, hateten katak matenek dijitál ne’e fó valor ida ba sira atu "ezerse saida maka sira iha," atu nune’e sira bele hatudu sira-nia produtu ho di’ak iha merkadu.

Vizaun Ba Globalizasaun

Diretór Diresaun Nasionál Dezenvolvimentu Juventude (DNDJ), Sr. Firminio Dias Quintas Soares, subliña katak formasaun ne'e hanesan pasu importante atu prepara joven sira iha Munisípiu Ermera hodi kompete iha mundu globalizasaun.

“Ha’u enkoraja nafatin juventude sira iha Munisípiu Ermera atu buka aprende barak iha área oioin, liuliu área Plataforma online hanesan Artifisial Intelijénsia (AI) no Canva hodi kompete iha mundu globalizasaun,” tenik DNDJ Firminio.

Mensajen ida-ne’e fó direksaun vizaun katak MJDAK haree literasia dijitál la’ós de’it hanesan kbiit báziku, maibé hanesan buka'e atu asesu ba oportunidade boot liuhosi AI no plataforma avansadu sira seluk.

#MídiaMJDAK