DILI, 04 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin simu audiénsia husi delegasaun Konsellu Imprensa Timor-Leste (CI) iha Salaun Magna MJDAK, Lecidere.

Audiénsia ne'e ho objetivu atu husu apoiu lojístiku no tékniku husi Ministériu ba atividade boot ida ne'ebé CI sei realiza iha Postu Administrativu Balibo, Munisípiu Bobonaru, durante loron haat, hahú hosi 13 to'o 16 Outubru 2025.

Komemorasaun Istóriku no Promosaun Liberdade Imprensa

Atividade ne'e lori tema prinsipál: "Liberdade Imprensa ba Lia Loos no Justisa: Tinan 50 Trajédia Balibo". Eventu ne'e sei komemora pontu importante rua:

1. Tinan 50 Trajédia Balibo: Komemora sakrifísiu boot husi jornalista internasionál na'in-lima ne'ebé lakon sira-nia vida iha luta ba libertasaun nasionál.
2. Selebrasaun loron nasionál liberdade imprensa ba dala-III.

Atividade iha Balibo sei la'ós de'it feira fotografia no jornalista, maibé mós sei inklui atividade desportu komunitáriu nian. Desportu ne'e hanesan dalan ida atu fó animasaun ba komunidade no fó onra ba sakrifísiu sira ne'ebé halo ona.

Komitmentu MJDAK nian

Iha enkontru ne'e, Ministru Nelyo Isaac Sarmento hateten katak MJDAK prontu atu apoia totalmenteatividade ne'e.

Ministru subliña katak eventu ne'e importante tebes atu hametin liberdade imprensa nu'udar pilár demokrasia nian, no mós atu promove dame liuhusi desportu, hodi lori benefísiu ba komunidade iha área fronteira.

Apoiu ne'e reflete komitmentu Governu nian hodi fó valor ba istória nasionál no hametin kooperasaun entre instituisaun sira.

#MídiaMJDAK