MANUFAHI, 08 JUÑU 2026 – Ministériu Juventude, Desportu, Arte no Kultura (MJDAK), liuhusi Xefi Departamentu Dezenvolvimentu Infraestrutura (XDDI), Paulo Jorge Amaral, ne'ebé akompaña husi Tékniku MJDAK, Sr. António Ximenes, husi Direção Nasional Patrimóniu, Lojístika no Infraestrutura (DNPLI), realiza vizita tékniku hodi hasoru malu ho Gestor Operasionál CEFOBOM, Sr. Mariano da Costa, iha Sentru Foin-sa'e Dom Boaventura Maun-fahe, Manufahi.

Vizita ne'e hala'o ho objetivu atu halo levantamentu dadus no observasaun direta ba kondisaun sentru nian, hodi prepara proposta reabilitasaun. XDDI Paulo Jorge Amaral haktuir katak bazeia ba proposta atu halo reabilitasaun sentru ne'e, ekipa MJDAK tun direitu ho tékniku hodi observa saida mak sentru presiza husi Governu atu fó apoiu.

"Dadus ne'ebé ami rekolla sei ba Dili hodi prepara BOQ (Bill of Quantities) no halo parecer ba Sua Exelénsia Ministru," dehan Paulo Jorge. Nia mós husu ba Gestor Operasionál atu akompaña tékniku MJDAK hodi observa parte ne'ebé sentru presiza atu halo reabilitasaun.

Gestor Operasionál CEFOBOM, Sr. Mariano da Costa, hato'o agradesimentu ba Governu liuhusi MJDAK tanba ohin bele tun ho tékniku hodi observa problema ne'ebé sentru enfrenta. Nia husu ba MJDAK atu aselera lalais hodi halo reabilitasaun, tanba tempu udan no anin, sentru la seguru ho kalen kuak, udan tama liur ba sala, no foru lahuk hotu ona.

"Sentru ne'e konstrui iha tinan 2008 no seidauk hetan reabilitasaun dala ida. Sentru hotu-hotu iha teritóriu tomak Governu fó apoiu fasilidade kompletu, maibé úniku Sentru Foin-sa'e Dom Boaventura Maun-fahe mak la hetan apoiu hodi halo reabilitasaun," hatete Gestor Operasionál.

MJDAK reafirma kompromisu atu garante katak sentru juventude sira iha munisípiu hotu hetan infraestrutura ne'ebé seguru no konduzivu ba dezenvolvimentu foin-sa'e sira.

#MediaMjdak