DILI, 21 Agostu 2025 – Ministériu Juventude, Desportu, Arte no Kultura (MJDAK) realiza serimónia enseramentu ba estudante na'in-haat (4) hosi Sentru Nasionál Formasaun Profesionál (CNFP), Becora, ne'ebé kompleta ona sira-nia estájiu profisionál fulan ida. Atividade ne'e hala'o iha Salaun Ema ho Difisiénsia, MJDAK, Lecidere, Díli.

Estajiu hanesan Pasu Importante ba Karreira Joven sira-nian

Iha serimónia ne'e, Xefe Gabinete MJDAK, Egas Barros Guterres Godinho, subliña importánsia husi papél estájiu iha dezenvolvimentu abilidade profisionál joven sira nian. Nia hatete katak estájiu hanesan pasu importante ida atu prepara joven sira ba sira-nia futuru, hodi fornese esperiénsia prátika ne'ebé valiozu.

“MJDAK agradese ba fiar husi CNFP, ne’ebé fó ona oportunidade ba ami atu sai parseiru hodi eduka no kapasita joven sira. Ho esperiénsia iha ne'e, ami fiar katak imi sei uza buat ne’ebé imi aprende hanesan matadalan hodi aplika iha imi-nia karreira,” dehan Egas Barros.

Iha parte CNFP nian, Formadór Ananias Pinto espresa gratidaun ba MJDAK tanba simu estudante sira. Nia hatutan katak estájiu ne'e fó ona oportunidade ba estudante sira atu komprende liután kona-ba área sira-ne'ebé sira estuda no iha ligasaun direitu ho servisu iha Ministériu.

Rekonhesimentu ba Kontribuisaun Estudante sira-nian

Atu hatudu agradesimentu no kultura, estudante sira-ne'ebé inklui Agusta Nelzia M. I. S. Pinto, Noemia M. Soares da Silva, Marta Soares da Costa, no Celia Mendonça de Araujo tara tais ba superiór sira iha MJDAK.

Iha parte MJDAK nian, sira fó sertifikadu estájiu ba estudante sira, nu'udar rekoñesimentu ba sira-nia kontribuisaun no dedikasaun durante estájiu ne’e. Serimónia enseramentu ne’e simboliza kooperasaun ne'ebé di'ak entre Ministériu no instituisaun formasaun profesionál hodi harii jerasaun foun ne'ebé kualifikadu.

#MídiaMJDAK