Dili, 24 Novembru 2025 – Ministériu Juventude, Desportu, Arte no Kultura (MJDAK) simu ona ekipa husi Provedoria Direitu Umanu no Justisa (PDHJ) hodi hala’o atividade Levantamentu Dadus kona-ba implementasaun prinsipál Boa Governasaun iha Instituisaun. Atividade ne’e realiza iha Salaun Ba Ema ho Defisiénsia, Lesidere, Dili.

KOMPRÓMISU BA TRANSPARÉNSIA

Diretór Jerál Juventude (DJJ) MJDAK, David Tomás de Deus, halo abertura badak no hateten programa ne’e importante tebes atu funsionáriu permanente no Ajente Administrasaun sira bele kontribui ba métrika Boa Governasaun nian.

David Tomás de Deus: "Programa ne’ebé PDHJ hala’o iha MJDAK ne’e nu’udar oportunidade boot. Peskiza ne’e seriu, no ami enkoraja funsionáriu sira hotu atu partisipa ativu hodi prienxe formuláriu rekoilla dadus nian, atu nune’e ita bele hametin transparénsia no boa governasaun iha Ministériu."

METODOLÓGIA PESKIZA PDHJ

Diretora Unidade Asisténsia Jurídika Administrasaun no Peskiza (UAJAP) PDHJ, Sra. Teresinha Ximenes, hato’o agradesimentu ba MJDAK ne'ebé simu ona proposta peskiza ne’e.

Sra. Ximenes hateten katak antes ne'e sira iha ona kooperasaun di’ak ho Diresaun Rekursu Umanu MJDAK, ne'ebé fó dadus prelimináriu kona-ba lista funsionáriu permanente no ajente administrasaun sira, hodi fasilita prosesu.

Teresinha Ximenes: "Levantamentu dadus ida-ne’e hamutuk ho ministériu no sekretaria estadu balun ne’ebé ami klaster ona tuir Planu Estratéjiku Dezenvolvimentu Nasionál (PED 2011-2030). MJDAK tama iha klaster asuntu sosiál sira (hamutuk ho MS, MESSC, SEII, SEKOMS)."

KOMPREENSAUN DADUS

Peskiza PDHJ nian uza metodolojia ida ne’ebé aplika kestionáriu ba funsionáriu permanente no ajente administrasaun sira, ho baze iha populasaun funsionáriu MJDAK nian.

Partisipasaun ativu ba atividade Levantamentu Dadus ne’e mai husi kargu xefia sira no Xefe Departamentu sira iha MJDAK, hodi fó kontribuisaun importante ba avaliasaun nasionál kona-ba implementasaun prinsipiu Boa Governasaun nian.

#MídiaMJDAK