DILI, 27 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin lidera diskusaun hamutuk ho Korea International Cooperation Agency (KOICA) no Project Management Committee (PMC) kona-ba progresu treinamentu desportu ba labarik no preparasaun entrega fasilidade desportu ba jestaun Governu nian, liuhosi MJDAK.

Diskusaun ne'e hala'o iha Dili, ho partisipasaun husi Country Director KOICA Timor-Leste Office, Sr. Youn Hwa Kong, Diretora-Jerál Servisu Korporativu, Diretór-Jerál Desportu, Xefe Gabinete MJDAK, Diretór Nasionál, no ekipa husi PMC no KODAC.

Vizaun MJDAK: Sentru Akademia Futeból iha Becora

Ministru Nelyo Isaac Sarmento realsa katak projetu ne’ebé KOICA-PMC kaer hela tenke kontinua nafatin, tanba futuru nasionál ne’e iha labarik sira-ne'ebé pratika desportu nia liman.

"Ami hakarak uza fasilidade ne'ebé KOICA halo iha Becora ne’e atu sai hanesan sentru akadémia," dehan Ministru.

MJDAK nia planu ba oin mak atu konklui lalais kampu futebol tolu (3) hanesan Kampu Alor, Kampu Bintang, no Kampu Malinamuk Comoro nian, hodi fó oportunidade ba labarik sira rihun lima (5,000) ba leten hodi pratika desportu nian.

Ministru mós hato'o agradesimentu ba KOICA tanba prepara ona treinadór no mentór sira, ne’ebé sei sai hanesan sentru edukadór ba akadémia nian.

Kria Ekosistema Futeból Foun

MJDAK fó hanoin ba PMC atu kria ekosistema ida ba futeból labarik kiik oan sira. Hanesan parte husi inisiativa ne'e, MJDAK apresia KOICA nia apoiu hodi organiza kompetisaun desportiva ba labarik sira ne'ebé la'ós membru PMC nian, hodi bele hetan fini futeból ne'ebé di'ak.

Objetivu husi ekosistema ne'e mak atu labarik sira bele: Aprende konesimentu desportu nian. Respeita ema seluk, malu, no regra futeból nian.

Ministru realsa katak iha komitmentu boot tebes atu koopera nafatin ho Governu Korea, liuhosi KOICA-PMC, hodi dezenvolve labarik sira ho excelénsia iha sentru akadémia futeból Becora, no bele loke nia klube iha munisípiu sira, hodi habelar konsiénsia katak futeból ne'e ba Timor-Leste hotu.

Apoiu Kontínuu husi KOICA

Iha fatin hanesan, Country Director KOICA Timor-Leste Office, Sr. Youn Hwa Kong, hatete katak KOICA kontente tebes ba kooperasaun di'ak ne'ebé ho Governu Timor-Leste hodi harii Projetu Dezenvolvimentu Desportu ba Labarik sira.

Sr. Youn Hwa Kong afirma katak KOICA prontu apoiu nafatin Governu Timor-Leste, liuhusi MJDAK, hodi dezenvolve futeból ba labarik sira ho di'ak liu tan no ba futuru longu prazu nian.

#MídiaMJDAK