DILI, 30 Juilu 2026, GKI—Ministru Juventude Desportu Arte no Kultura (MJDAK), Nelyo Isaac Sarmento (NIS), konsidera atividades foinsae hadomi natureza importante ba nasaun tanba foinsae sira ba hanorin ita nia komunidade iha area rurais oinsa kuidadu no proteze ambiente natureza.

NIS hato’o kestaun ne’e, wainhira simu membrus husi organizasaun  juventude hadomi natureza (JHN), hamutuk nain 150 iha areadores MJDAK, Kinta (30/7), antes aranka ba Munisipiu Likisa hodi halao atividades akampamentu.

NIS  sente orgullu no apresia ba juvetude hadomi natureza  sai hanesan pilar importante hodi  konsentra atu hadomi ita nia natureza. Tanba ita kontinua hadomi natureza ho hanoin ne'ebe mos antes hanoin buat bo'ot.

“Leorema, fatin ida ne'ebe furak tebes ho kafe Leobali iha ne'eba, laos atu hasai fotografia deit maibe buka konhese no interese diak natureza no natureza ne'e sai furak liu tan,” NIS inspira membrus JHN sira.

Eis SEKOMS ne’e, fo hanoin, importante ba membrus JHN mak  oinsa kunhese diak hodi hadomi natureza np promove no eduka ita nia populasaun hodi kuidadu natureza.

Tantu imi nia misaun ne'e inportente,  tanba tuir NIS, liu husi  domin hodi fo esplikasaun ba maluk sira hodi muda hanoin tradisional ba modernu hodi kuidadu natureza hanesan labele tesi ai no sunu rai arbiru hodi prevene inundasaun no rai halai hodi labele fo sala ba governu.

Iha fatin hanesan, Prezidente executivu Juventude Hadomi Natureza (JHN), Grazinha da Silva Conceicao,   agradese   ba MJDAK sai hanesan aman ba organizasaun juvenil   hotu hodi  apoiu atividade epesial ba organizasaun JHN nia atividade akampamentu iha area Munisipiu Likisa.  

Agradese mos ba autoridade lokal sira ne'ebe, oferese fatin akampamentu no apoiu tekniku no ekipa balun iha lokasi hodi simu partisipa husi no partisipa husi Liquica iha ne'eba. Tinan 2026, Grazinha informa,   atividade akampamentu JHN realiza iha Munisipio Liquic, Postu Administrativu Bazartete, Suku Leorema, Aldeia Baura.

"Husu ba partisipante sira uza no sente natureza foun ambiente foun  sai hanesan fatin bibleoteka, imi bele aprende setor oioin iha ne'eba hanesan edukasaun ambiental no karakter rasik," Grazinha alert aba nia membrus sira.  

Objetivu prinsipal  ba akampamentu  nasional ne’e, tuir Grazinha,  fo oportunidade ba joven sira hotu ne'ebe maka la hetan oportunidade hola parte iha joventude Hadomi Natureza.  Atividade ne'e atu hanorin kolega no komunidade sira oinsa bele maduru hola desizaun iha tempu risku liu-liu hala'o atividade prosesu mesak.

“Lori Itaboot sira ba eskola ailaran maibe laos atu aprende deit, mas lori mos Itaboot sira atu sente sai hanesan joven Eroi ba futuru mai, lori itaboot sira ba aprende iha ailaran atu konhese luta no fila mai hodi haklean  aplikasi ba dezenvolvimentu,” apela Grazinha.

Komisaun organizadora ba atividade akampamentu ne'e total 50 pesoas no partisipante total 150 pesoas mai husi munisipio Dili no Liquica rasik. Orsamentu ne'ebe apoiu inisitiva husi Gabineti MJDAK ho montante dolar amerika rihun tolu (USD3,000.00)  hodi realiza atividade akampamentu ne'e durante loron hat (4)

Diretur Jeral Juventude MJDAK, Mario Tilman, Diretur Nasional Asosiativismu Juventude, Napoliao Xavier no Xefi Departementu Fortalesementu Organizasaun Juventude, Jacinto Ximenes akompanha direta abertura akampamentu atividade JHN ne’e.  #MediaMjdac