AILEU, Seloi Kraik, 29 Agostu 2025 – Ministériu Juventude, Desportu, Arte no Kultura (MJDAK), liuhosi Diretór-Jerál Juventude (DJJ), Sr. David Tomás de Deus, hala'o diálogu importante ida ho Foinsa'e ho Defisiénsia hamutuk 150. Sira mai husi Munisípiu Aileu, Ainaru, Manufahi, no Covalima. Diálogu ne'e realiza iha Suku Seloi Kraik, Postu Administrativu Laulara, Munisípiu Aileu.

Baze Legál no Polítika Nasionál Juventude

Iha ninia intervensaun, DJJ David Tomás de Deus esklarese kona-ba knaar no mandatu MJDAK nian, liu-liu ba asuntu Juventude, ne'ebé bazeia ba Artigu 19 Konstituisaun RDTL no implementa liuhosi Polítika Nasionál Juventude no Planu Asaun Nasionál Juventude nian.

DJJ realsa katak polítika juventude nian foka ba pilar tematiku lima (5):

1. Juventude ho Edukasaun.
2. Juventude ho Moris Saudavel.
3. Juventude ho Partisipasaun Sivika.
4. Juventude ho Empregu no Empregabilidade.
5. Juventude ho Violénsia no Krime.

Resposta Governu nian ba Ema ho Defisiénsia

MJDAK, hanesan organizmu Estadu ne'ebé responsabiliza ba asuntu Juventude no Desportu, fó garantia katak asuntu kona-ba Foinsa'e ho Defisiénsia (EHD) iha ona fatin importante:

• Planu Asaun Nasionál ba Ema ho Defisiénsia: MJDAK iha responsabilidade espesífika ne'ebé atribui iha planu ida-ne'e (momentu sei SEJD).
• Apoiu ba Sosiál no Desportu: MJDAK apoia asosiasaun sira hanesan Asosiasaun Defisiénsia Timor-Leste (ADTL) no Komité Paralímpiku Nasionál Timor-Leste (CPNTL), inklui apoiu ba sira-nia partisipasaun iha eventu desportivu, hanesan ezemplu foin lalais iha SOTL Regional Games 2025 iha Manatutu.
• Asesibilidade Infraestrutura: MJDAK agora dadaun implementa ona prinsípiu asesibilidade ba EHD sira iha sentru juventude tolu (3): Sentru Juventude Comoro, Maliana, no Covalima, atu sira bele asesu ba formasaun no atividade sira.

Diálogu ne'e hala'o ho laran-nakloke, no foinsa'e ho defisiénsia sira hatudu antuziazmu boot hodi rona esplikasaun no hato'o perguntas kona-ba sira-nia preokupasaun sira.

Oradór prinsipál sira iha diálogu ne'e inklui reprezentante sira husi Ministériu Solidariedade Sosiál no Inkluzaun (MSSI), MJDAK, Diresaun Edukasaun Munisipál Aileu, Sekretáriu Asuntu Sosiál Munisipál Aileu, no mós Tékniku Superiór Servisu Asesora Gabinete Prezidente Repúblika ba Asuntu Inkluzaun Sosiál ba Ema ho Defisiénsia, Sra. Gilberta dos Santos Pereira.

#MídiaMJDAK