DILI, 13 JANEIRU 2026 (GCI-MJDAK) – Ministru Juventude, Desportu, Arte no Kultura (MJDAK), Sua Ekselénsia Nelyo Isaac Sarmento, ohin simu hodi halo despedida ofisiál ba delegasaun foin-sa’e na’in hitu (7) ne’ebé sei reprezenta Timor-Leste iha programa internasionál Ship for Southeast Asian and Japanese Youth Program (SSEAYP) ba dala-49 iha Japaun.

Delegasaun ne’e kompostu husi Carlos Cunha dos Santos nu’udar Koordenadór ekipa (Team Leader) husi MJDAK, hamutuk ho joven na’in neen (6) ne’ebé kompostu husi feto tolu (3) no mane tolu (3). Joven sira-ne’e mak sira ne’ebé submete ona aplikasaun iha Juñu 2025 no konsege liu iha prosesu selesaun ne’ebé rigorozu no selesionadu ona iha Fulan Novembru 2025.

Iha sorumutu ne’e, Ministru Nelyo Isaac Sarmento (NIS) subliña importánsia husi koperasaun ho Japaun, liuliu iha kestaun konservasaun tasi no ambiente ne’ebé sai nu’udar potensiál boot ba nasaun sira iha Pasífiku.

“Japaun iha potensiál boot, liuliu iha área tasi. Sira hakarak fahe esperiénsia ho nasaun sira iha Pasífiku kona-ba oinsa kuidadu ambiente tasi. Imi mak jerasaun foun no potensiál lideransa iha futuru; uza didi’ak oportunidade ne’e hodi aprende oinsa transforma potensiál tasi nian ba dezenvolvimentu ita-nia rai,” dehan Ministru Nelyo Isaac.

Apoiu no Kontinuidade Programa

Governu, liuhosi MJDAK, fó apoiu tomak ba delegasaun ne’e ho alokasaun orsamentu hamutuk USD 9,437. Prosesu preparasaun ne’ebé naruk, hahú husi selesaun iha Juñu to’o rekrutamentu finál iha Novembru 2025, hatudu kompromisu MJDAK nian hodi haruka de’it joven sira ne’ebé kumpri kriteiru no kualidade.

Koordenadór atividade, Carlos da Cunha dos Santos, hato’o agradesimentu ba Ministériu ne’ebé fasilita ona prosesu tomak. Programa SSEAYP ne’ebé hahú ona dezde tinan 1974 ne’e iha objetivu hodi promove amizade no perspetiva mundu nian entre foin-sa’e Japaun ho nasaun sira iha Sudeste Aziátiku (ASEAN).

Lista Delegadu:

1.    Carlos Cunha dos Santos (Team Leader-MJDAK)

2.    Alzira Erliana

3.    Domingos Belo Mendonça de Jesus

4.    Elvis Maria da Costa Belo

5.    Jeciliana Auxiladora Lopez de Araújo

6.    Judelino da Silva Barros Barreto

7.    Rovelia Olinda Guterres

#MídiaMJDAK