DILI, 6 Jullu 2026 – Governu Timor-Leste, liu husi serimónia ne'ebé realiza iha Hudi laran Dili, ohin lansa oficialmente kontrusaun ba Biblioteka Nasional, projetu estratéjiku ne'ebé sei sai fatin ba prezervasaun memória nasionál, apoiu ba edukasaun no peskiza, no asesu ba koñesimentu ba jerasaun futuru sira.

Serimónia lansamentu ne'e marka prezensa husi S.E. Vise-Primeiru-Ministru, Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Dato' Seri Francisco Kalbuadi Lay, ne'ebé reprezenta S.E. Primeiru-Ministru Kay Rala Xanana Gusmão. Prezensa mós husi S.E. Ministru Juventude, Desportu, Arte no Kultura (MJDAK), Nelyo Isaac Sarmento, no dignitáriu sira seluk.

Iha diskursu nian, Vise-PM Dato' Seri Francisco Kalbuadi Lay hateten katak serimónia ida-ne'e marka inísiu husi instituisaun ne'ebé sei prezerva memória nasionál, apoia edukasaun no peskiza, no fó asesu ba jerasaun futuru sira ba koñesimentu no istória Timor-Leste nian.

"Ha'u haksolok tebes ohin mai iha ne'e ba lansamentu konstrusaun Biblioteka Nasionál Timor-Leste nian. Ha'u sente onradu atu reprezenta S.E. Primeiru-Ministru Kay Rala Xanana Gusmão, ne'ebé fó fiar mai ha'u ho knaar atu partisipa iha eventu espesiál no importante ida-ne'e," dehan Vise-PM.

Nia hatutan, "Ohin marka liu fali inísiu edifísiu foun ida nian. Ida-ne'e marka inísiu hosi instituisaun ida ne'ebé sei prezerva ita-nia memória nasionál, apoia edukasaun no peskiza, no fó asesu ba jerasaun futuru sira ba koñesimentu no istória ita-nia rain nian."

Vise-PM enfatiza katak ba nasaun joven hanesan Timor-Leste, projetu ida-ne'e iha importánsia boot tebes. "Ita-nia povu luta ba independénsia la'ós de'it atu harii Estadu soberanu ida, maibé mós atu proteje ita-nia identidade, ita-nia lian sira, ita-nia kultura no ita-nia povu nia memória," nia hatete.

Biblioteka Nasional, tuir Vise-PM, sei hala'o papel importante hodi prezerva patrimóniu dokumentál nasaun nian no fornese fatin ba estudante sira, peskizadór sira, profesór sira, hakerek-na'in sira, no komunidade luan atu aprende, estuda no deskobre. Biblioteka ne'e sei ajuda mós salvaguarda istória luta nasionál nian, rikusoin kultura nian, no ideia sira ne'ebé forma sosiedade Timor-Leste nian.

"Harii nasaun la'ós de'it kona-ba estrada, ponte, portu no edifísiu públiku sira. Hirak-ne'e esensiál ba dezenvolvimentu ekonómiku no ba hadi'a ita-nia povu nia moris. Ida-ne'e mós kona-ba investe iha edukasaun, kultura, koñesimentu no memória nasionál," dehan Vise-PM.

Nia rekoñese katak serimónia ohin nian nu'udar rezultadu husi planeamentu tinan barak, preparasaun téknika no kooperasaun besik entre instituisaun oioin. Vise-PM hato'o agradese ba Autoridade Nacional do Petróleo, Sekretáriu Estadu Arte no Kultura, Ministériu Obras Públikas, Ajénsia Dezenvolvimentu Nasionál, Eni Timor-Leste, INPEX, no membru sira hotu hosi Komité Diretivu no Grupu Traballu Tékniku.

Nia mós rekoñese Kompromisu Konteúdu Lokál tuir Planu Dezenvolvimentu PSC JPDA 06-105, ne'ebé hetan apoiu husi Eni no nia parseiru joint-venture INPEX. "Parseria ne'e hatudu oinsá investimentu iha setór petrolíferu bele mós kontribui ba dezenvolvimentu tempu naruk ba ita-nia nasaun," dehan nia.

Vise-PM Dato' Seri Francisco Kalbuadi Lay taka diskursu ho apelu katak Biblioteka Nasional hanesan investimentu ida ba futuru Timor-Leste nian. "Ida-ne'e sei sai fatin ida iha ne'ebé ita-nia dokumentu sira, rejistu sira, livru sira no koñesimentu sira sei prezerva ba jerasaun sira iha futuru. Sei fó oportunidade ba foin-sa'e sira atu aprende kona-bá ita-nia rain nia istória, apoia peskizadór sira, edukadór sira no estudante sira hodi habelar koñesimentu, promove leitura, kriatividade no inovasaun, no garante katak ita-nia povu nia koñesimentu no tradisaun sira hetan protesaun no hatutan," tenik nia.

Vize-Primeiru-Ministru subliña katka ba Timor-Leste, projetu ida-ne'e iha signifikadu espesiál tanba istória barak maka prezerva ona liuhosi tradisaun orál, no Biblioteka Nasional sei sai ponte entre pasadu, prezente no futuru nasaun nian.