DILI, 27 Juilu 2026, GKI—Membrus Parlamentu Foinsae Nian (PFN), period 2024-2026, nain 105, pratika sorumutu bankada iha Eskola Sekundaria Publiku Finantil, Ai-mutin, Dili, Timor Leste. Membrus PFN 105 ne’e, reprezentante husi munisipiu 12 no RAEOA.

Objetivu sorumutu bankada ne’e mak halo diskusaun klean konaba dadus sosiais iha area edukasaun, saude, edukasaun siviku, joven ho empregu, joven no krime no empregabilidade, ne’ebe membrus sira rekoila iha ida-idak nia postus  no munisipius. No hafoin diskusaun, kontinua elabora ba dokumentus ida ho kontinua ba debates iha sesaun plenaria PFN nian.

“Enkontru Bankada ba loron da-ruak,  Parlamentu Foinsa’e Nian, periodu da-Lima tinan 2024-2026 ho totál membru hamutuk 105, kompostu husi 12 Munispiu no  RAEOA.  Sira sei akumula hotu fila fali rezultadu dadus ne’ebé sira foti iha idak-idak nia munisipiu, liga ba iha asuntu lima ne’bé mak temi iha politíka nasionál juventude nian mak hanesan, edukasaun, saúde, joven no partisipasaun sivíku, joven ho empregu no empregabilidade, joven ho krime no violénsia, akumula hotu tiha sei halo analiza fila fali nia problema no kauza hafoin mak elabora sai dokumentus ida,” esplika Presidenti APFTL (Asosiasaun Parlamentu Foinsa Timor Leste), Bemvinda G. Alves ba Media MJDAK, Segunda (27/7).

Tuir Bemvinda,  diskusaun komisaun ne’e diskute espesifiku ona ba area tematíku idak-idak bazeia ba problema ne’ebé sira foti iha sira nia postu inklui mós dadus husi rezultadu estudu vizita ne’ebé antes hala’o iha Munisipiu Bobonaro, Oekusi no Covalima no ikus liu mak hakat ba iha plenaria.

Sesaun plenaria PFN, Bemvinda informa, sei realiza iha loron 29-30 Juilu 2026, ne’ebe sei aprezenta no fortifika dadus ne’ebe membrus PFN sira levante iha diskusaun bankada no sei rekomenda problemas sosiais hotu ba Orgaun Soberania Estadu RDTL.

Tuir planu kalendariu Diresaun Nasional Asosiativismu Juventude (DNAJ) no Asosiasaun Parlamentu Foinsae Timor Leste (APFTL), membrus PFN 105, sei vizita Parlamentu Nasional Timor Leste iha loron 30 Juilu 2026, hodi entrega dokumentus rezultadu plenaria PFN, ba orgaun soberania RDTL nian.

Akompanha no observa direta sorumutu bankada membrus PFN ne’e, Xefi Departementu Asosiativismu Juventude MJDAK, Juvenal de Araujo, Xefi Departementu Fortalesementu Organizasaun Juventude MJDAK, Jacinto Ximenes no funsionariu DNAJ, inklui fasilitator APFTL. #MédiaMjdak