DILI, 17 MARSU 2026 – Governu liuhusi Ministériu Juventude, Desportu, Arte no Kultura (MJDAK), hamutuk ho UNICEF Timor-Leste, ofisialmente inaugura fasilidade asesibilidade ba Ema ho Difisiénsia (EhD) iha Sentru Labarik no Juventude Comoro (CCYC). Inaugurasaun ne’e hanesan kontinuidade husi programa inkluzaun nasionál hodi garante joven sira ne’ebé iha nesesidade espesiál bele asesu ba sentru juventude.

Sua Exelénsia Ministru Nelyo Isaac Sarmento hamutuk ho Reprezentante UNICEF, Teija Vallandingham, mak lidera serimónia ne’ebé hala’o iha CCYC, Dili. Marka prezensa mós Sua Exelénsia Sekretáriu Estadu Arte no Kultura (SEAK), Jorge Soares Cristóvão, Asesór Palásiu Prezidensiál ne’ebé mós nu’udar Embaixadór ba EhD, Gaspar Afonso.

Iha nia diskursu, Ministru Nelyo Isaac Sarmento subliña katak inisiativa asesibilidade ne’e la’ós foin akontese iha Dili de'it, maibé kobre ona fatin estratéjiku seluk.

“Ohin ita kria tan fasilidade asesibilidade iha CCYC. Antes ne’e, ita kria no inaugura ona fasilidade hanesan iha Sentru Juventude Munisípiu Bobonaro no Cova Lima. Ida-ne'e hatudu ita-nia kompromisu hodi kria ambiente inkluzivu iha instituisoens Estadu sira hotu,” dehan Governante ne’e.

Ministru mós esplika katak dezenvolvimentu ne’e bazeia ba Planu Asaun Anuál (PAA) ne’ebé foka ba kria kondisaun ba joven sira, liuliu sira ne’ebé iha difisiénsia matan ka fíziku, bele hetan asesu ba formasaun no dezenvolvimentu kbiit.

Ministru Nelyo mós iha hanoin estratéjiku hodi dezenvolve CCYC iha futuru: “Fatin ne’e estratéjiku tebes. Ami iha vizaun hodi kria mós fasilidade desportu ne’ebé adaptadu, nune’e joven EhD sira bele aproveita sira-nia talentu ho dignidade.”

Reprezentante UNICEF iha Timor-Leste, Teija Vallandingham, fó apoiu ba inisiativa ne’ebé konsidera nu’udar kbiit hodi fó espasu ba labarik no joven sira. Alende asesibilidade fíziku, CCYC mós dezenvolve ona kondisaun ba Labarik Pré-Eskolár nu’udar parte husi dezenvolvimentu integradu.

Partisipa iha inaugurasaun ne’e, Embaixadór EhD hamutuk ho reprezentante liñas ministériu sira, Autoridade Postu Dom Aleixo, Xefe Suku, Xefe Aldeia, inklui mós organizasaun sira ne'ebé luta ba direitu difisiénsia nian hanesan RHTO, AHISAUN, no JHN.

Atividade ne’e remata ho vizita ba asesibilidade foun ne’ebé sai nu’udar símbolu katak MJDAK iha mandatu kinta governu nian, la husik joven ida hela iha kotuk.

#MídiaMJDAK