LIKISÁ, 10 JUÑU 2026 – Governu liuhusi Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, hamutuk ho Ministru Justisa no Ministru Interiór, partisipa iha diskusaun espesialidade ba Proposta Lei nº 24/VI (3ª) kona-ba prátika arte marsiais, ne'ebé hala'o iha Salaun Tokodede, Munisípiu Likisá.

Diskusaun ne'e dirije husi Prezidente Komisaun G Parlamentu Nasionál, Deputadu Armando dos Santos Lopes, no hetan partisipasaun husi Deputadu sira Komisaun A no B, ho objetivu atu rona hanoin no hadi'a kbiit legál ba prátika arte marsiais iha Timor-Leste. Sesaun ne'e mós marka prezensa husi Sekretária ba Konferénsia Episkopál Timor-Leste (CETL), KRAM, Federasaun Desportivas, FESTIL, hamutuk ho asesór no dirijente sira.

Proposta lei ne'e kria ho objetivu atu regula klube ka sentru sira ne'ebé hakarak harii prátika arte marsiais, nune'e fatin no atividade sira tenke ho koñesimentu legál husi autoridade lokál no federasaun desportiva relevante sira. Objetivu mak atu garante katak atividade arte marsiais hala'o ho padraun seguransa no transparénsia.

Ministru Nelyo Isaac Sarmento subliña katak regulasaun ne'e importante tebes hodi evita sentru sira-ne'e organiza an de'it ho modu independente la ho koñesimentu estadu nian, liuliu iha kooperasaun direta ho organizasaun sira iha li'ur. Nia mós enfatiza katak regulasaun ne'e sei proteje prátika arte marsiais nasionál hodi la'o tuir padraun ne'ebé klaru no legal.

Diskusaun ne'ebé kontinua husi loron 10 to'o 12 Juñu ne'e mós involve lideransa relijioza, federasaun desportiva, no sosiedade sivíl, hodi garante katak proposta lei ne'e akomoda interese hotu-hotu no refleta valor kulturál no dezenvolvimentu nasionál.

Diskusaun espesialidade ne'e sei kontinua ho objetivu atu remata proposta lei no submete ba votasaun iha Parlamentu Nasionál. Lei ida-ne'e sei sai instrumentu legál importante ba dezenvolvimentu arte marsiais iha Timor-Leste, hodi promove prátika ne'ebé seguru, ordenadu, no kontribui ba dezenvolvimentu desportu nasionál.

Mai ita hotu hein no apoiu pasu legál ida-ne'e, hodi dudu prátika arte marsiais ne'ebé mós ho duni dezenvolvimentu, orden, no pas ba ita nia rain!

#MediaMjdak