DÍLI, 31 Jullu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa ona iha Konferénsia Imprensa ba eventu desportivu ne'ebé emosionante, ho títulu "Revolta Kombat Chapter 1 Boxing".

Ministru Nelyo Isaac Sarmento louva inisiativa furak husi grupu joven Revolta Kombat ne'e. Nia realsa katak eventu hanesan ne'e importante tebes tanba la'ós de'it atu promove desportu, maibé atu kontribui ba dezenvolvimentu sosiál no unidade nasionál:

Valór Sosiál husi Boxe

1. Promove Unidade: "Lori unidade ba joven sira! Joven bele kompete iha ring laran, maibé li'ur nafatin amigu, hodi hametin espíritu desportivu."
2. Solusaun ba Problema Sosiál: "Halo joven sira hato'o sira-nia enerjia ho forma positiva no saudavel, hodi fó solusaun ba problema sosiál."
3. Ezemplu Inovasaun: "Sai ezemplu ba joven seluk! Enkoraja joven sira atu kria eventu ho modalidade desportu seluk, hodi diversifika atividade desportiva nasionál."

Ministru NIS hateten katak Governu, liuhosi MJDAK, komprometidu atu nafatin fó apoiu ba inisiativa joven sira-nian ne'ebé saudavel no konstrutivu, hodi dudu sira ba oin.

Eventu ne'e sei lori boxista Timoroan na'in sanulu (10) no boxista husi Indonézia na'in sanulu (10) atu kompete iha ring laran. Ida ne'e hanesan pasu boot ida ba dezenvolvimentu desportu boxe iha Timor-Leste no hametin unidade nasionál, no mós interkámbiu desportivu internasionál.

Parabéns ba Revolta Kombat ba inisiativa ne'e!

#MídiaMJDAK