DILI, 4 Setembru 2025 – Ministériu Juventude, Desportu, Arte no Kultura (MJDAK) ohin hala'o enkontru kordenasaun urjente ho Diretores-Jerál, Diretór Nasionál no kargu xefia sira hodi diskute no prioriza Planu Prográmátiku ba tinan 2026.

Reuniaun ne'e hala'o nu'udar pasu importante ida hafoin ekipa tékniku MJDAK hasoru malu ho Ministériu Finansas iha loron 25 Agostu hodi aprezenta sira-nia proposta Planu Asaun Anuál.

Prioridade Programátika no Limitasaun Tempu

Iha reuniaun ne'e, Sua Exelénsia Ministru Nelyo Isaac Sarmento subliña katak presiza halo ajustamentu esensiál ba planu sira iha área Juventude, Desportu, no Arte no Kultura. Nia enkoraja lideransa MJDAK nian atu fó prioridade ba programa ne'ebé bele iha impaktu no bele implementa duni.

"Planu barak ne'ebé ita trasa la konsege eziste tanba tempu ne'ebé limitadu tebes," Ministru hateten. "Tanba ne'e, ita presiza diskute hodi prioriza programa sira ne'ebé loloos sei implementa iha tinan 2026, hodi nune'e bele fó legadu ida ba ita-nia nasaun."

Kompromisu ba Outcome ne'ebé Klaru

Ministru Nelyo Isaac Sarmento mós fó hanoin hikas orientasaun husi Governu Konstitusionál IX nian liuhosi Ministériu Finansas: MJDAK presiza uza outcome no output ne'ebé klaru atu sukat rezultadu sira ba tinan lima oin.

Ne'e atu garante katak Planu Asaun Anuál MJDAK nian liga ho ministériu nia kompeténsia no sei fó impaktu ne'ebé signifikativu ba dezenvolvimentu nasionál.

Reuniaun ida-ne'e hatudu Ministru nia kompromisu atu asegura katak atividade sira MJDAK nian la'ós de'it atu gasta orsamentu, maibé atu lori rezultadu konkretu ne'ebé mak fó benefísiu ba juventude, desportu, no kultura Timor-Leste nian iha tinan 2026.

#MídiaMJDAK