DÍLI, 28 JANEIRU 2026 (MJDAK) – Sua Eselénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin, kuarta-feira, hala’o abertura ofisiál ba espozisaun arte ho títulu "Echoes of 1999", ne’ebé hala’o iha Hotel Palm Springs, Fatuhada, Díli.

Iha serimónia ne’e, Ministru Nelyo Isaac Sarmento akompaña husi Sua Eselénsia Sekretáriu Estadu Arte no Kultura (SEAK), Jorge Soares Cristóvão. Marka mós prezensa membru Governu balu, korpu diplomátiku, embaixadór sira, konvidadu nasionál no internasionál, hamutuk ho komunidade artista sira.

Ponte ba Reziliénsia no Identidade

Espozisaun "Echoes of 1999" la’ós de’it aprezentasaun pintura, maibé nu’udar ponte ida ne’ebé liga arte ho istória luta libertasaun nasionál. Atividade ne’e iha signifikadu kulturál no istóriku ne’ebé boot, tanba aprezenta koleksaun impaktante husi obra sira ne’ebé kria iha Darwin, Austrália, iha tinan 1999—períodu ne’ebé krítiku tebes ba destinu nasaun nian.

Espozisaun ne'e integra kbiit kreativu husi:

·       Artista Timor-oan sira ne'ebé luta liuhusi pintura;

·       Artista Indíjena Australianu sira husi sidade Darwin;

·       Membru Misaun Nasaun Unidas iha Timor Lorosa'e (UNAMET).

Obra hirak ne’e reprezenta reflesaun forte kona-ba reziliénsia, esperansa, no determinasaun povu Timor-Leste nian durante períodu pivotal iha istória nasaun nian. Através husi arte, sira konsege dokumenta emosaun hodi sai sasin ba jerasaun foun.

Valorizasaun ba Patrimóniu Istóriku

Iha ninia intervensaun, Ministru Nelyo Isaac Sarmento fó sai katak espozisaun ida-ne’e importante tebes hodi valoriza kreatividade artista sira-nian no promove patrimóniu istóriku. Atividade ne’e sai fatin ba artista sira hodi fahe sira-nia vizaun kona-ba pasadu hodi harii futuru ne’ebé kmanek liután.

Iha fatin hanesan, Sua Eselénsia SEAK, Jorge Soares Cristóvão, mós fó ninia apoiu tomak ba inisiativa ne’ebé hametin ligasaun entre arte nasionál no solidariedade internasionál ne’ebé mosu iha tinan 1999.

#MídiaMJDAK