DÍLI, 5 Agostu 2025 – Ministériu Juventude, Desportu, Arte no Kultura (MJDAK) ohin realiza diskusaun ofisiál ida ho Korea International Cooperation Agency (KOICA) kona-ba manuál jestaun no manutensaun ba fasilidade desportu ne’ebé KOICA oferese ona ba Timor-Leste.

Diskusaun importante ida-ne'e hala’o iha Hotel Palm Spring, Fatuhada, ho partisipasaun Diretora-Jerál Servisu Korporativu MJDAK, Sra. Isabel Adalziza Fátima Rodrigues Ferreira, no reprezentante KOICA, Sr. Jae Sung Gwak husi Project Management Committee (PMC). Partisipa mós Xefe Departamentu Tékniku Federasaun Futebol Timor-Leste (FFTL), Sr. Gaspar Quintão da Silva.

Preserva Fasilidade ba Juventude

Objetivu prinsipál husi diskusaun ne'e maka atu fornese matadalan ba jestaun kuidadu ho responsabilidade ba Kampu Futeból sira ne’ebé importante iha Dili, hanesan iha Becora, Bidau, Kampung Alor, no Comoro, atu bele kontinua fó benefísiu ba labarik no juventude Timoroan.

Diretora-Jerál Isabel realsa kompromisu MJDAK nian ba jestaun:

"Ita tenke uza fasilidade sira-ne’e ho fó valor, hodi promove dezenvolvimentu desportu ba jerasaun foun. Preserva fasilidade sira-ne'e nu'udar investimentu ba futuru nasionál."

Reprezentante KOICA, Sr. Jae Sung Gwak, hato'o apresiasaun ba kolaborasaun ne'ebé di'ak no husu ba autoridade sira atu uza fasilidade sira-ne'e ho kuidadu hodi garante nia durasaun.

Enkontru ne’e mós partisipa husi Xefe Departamentu Jestaun Teknolojia no Patrimóniu, Marlia Celina Amaral de Fátima, no Xefe Departamentu Desportu Edukasionál, José Monteiro, hamutuk ho ekipa PMC KOICA.

#MídiaMJDAK