DILI, 22 Agostu 2025 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento (NIS), ohin lidera reuniaun importante ho organizasaun desportu nasionál sira hodi hahú preparasaun urjente ba atleta Timor-Leste nian atu partisipa iha eventu internasionál boot rua ne'ebé sei hala'o iha Tailándia: SEA Games 2025 no SEA Para Games 2026.

Reuniaun ne'e foka ba diskusaun kona-ba oinsá atu prepara atleta sira iha tempu badak ne'ebé sei iha to'o kompetisaun SEA Games. Ministru Nelyo Isaac hateten katak presiza duni preparasaun másimu tanba eventu ne'e besik ona.

Prioridade ba Modalidade Xave

Hosi modalidade sira ne'ebé sei partisipa, MJDAK tau atensaun espesiál no fó prioridade ba modalidade lima (5) ne'ebé konsidera iha poténsia: Futeból, Atletizmu, Taekwondo, Karate-do no Boxe

Governu, liuhosi MJDAK, hamutuk ho Komité Olímpiku Timor-Leste (CDTL) no Komité Nasionál Paralímpiku Timor-Leste (CPNTL), sei servisu hamutuk hodi fó apoiu, orientasaun, no fasilidade ba federasaun desportu sira ne'ebé inklui iha lista ne'e.

Apelu ba Federasaun no Atleta sira

Ministru NIS husu ba federasaun hotu-hotu atu hahú kedas forma ekipa preparasaun no fó preparasaun másimu ba sira-nia atleta. Nia subliña importánsia ba Atleta sira hodi hatudu responsabilidade nu'udar embaixadór nasaun:

"Atleta sira mak reprezentante no embaixadór ba nasaun Timor-Leste nian iha eventu ne'e, tanba ne'e sira tenke prepara-an ho di'ak, inklui disiplina no mentalidade manán nian."

Reuniaun ne'e partisipa husi Xefe Gabinete MJDAK, Asesór sira, Diretór Jerál Desportu, Diretór Desportu Federadu, Xefe Departamentu Seleksaun Nasionál, Vise Prezidente CPNTL, no ofisiál sira husi diresaun nasionál desportu nian. Kompromisu koordenadu ne'e garante katak Timor-Leste nia partisipasaun sei la'o ho dignidade no kualidade.

#MídiaMJDAK