Dili, 14 Jullu 2026 – Ministériu Juventude, Desportu, Arte no Kultura (MJDAK), liu husi Xefi Departamentu Infraestrutura, Paulo Amaral, hamutuk ho ekipa teknika husi ministeriu, hala'o vizita observasaun ba kampu futebol iha Kampu Alor, Dili. Vizita ida ne'e objetivu atu avalia progresu físiku obra no identifika dezafiu sira ne'ebé enfrenta durante prosesu konstrusaun.

Iha vizita ne'e, Enjineiru Hipolito da Cunha husi kompania Mimi Lota Lda esplika katak obra ne'e tama ona fulan hitu no atinji progresu pursentu 15. Nia hateten katak durante fulan ne'en ho balun ne'e, sira akompanha progresu servisu iha terrain no loroloron, maibé enfrenta failansu lubuk ida ne'ebé atrapaila projetu.

"Tuir progresu ne'ebé ami rasik akompana, iha failansu lubuk ida ne'ebé atrapaila projetu refere no servisu tarde, liu husi material ne'ebé mai tarde los," deklara Enjineiru Hipolito.

Nia mós hatutan katak atrasu material ne'e afeta diretamente servisu iha terrain. "Tarde husi material ne'e mos afeta projetu iha terrain refere. Nune'e mos parte husi traballadór sira kuaze fulan ne'e nia laran la mai servisu, no traballadór moa barak mak troka malu dala tolu ona. Ida ne'e mos afeta hotu ba servisu ne'ebé mak iha," nia tenik.

Maski enfrenta dezafiu sira ne'e, Enjineiru Hipolito garante katak sira kontinua esforsu nafatin atu finaliza obra iha fulan ne'en nia laran tuir servisu ne'ebé mak iha.

"Obra ida ne'e mos hanesan enjineiru garante no esforsu nafatin hodi finaliza iha fulan ne'en nia laran obra refere, no tuir servisu ne'ebé mak iha, no ami sei hadia ida-idak no bele atinji tuir tempu ne'ebé mak iha molok entrega ba governu liu husi MJDAK," nia hateten ho otimista.

Iha fatin, ekipa midia mós ko'alia ho Miguel de Araujo, ida husi traballadór sira, ne'ebé hateten katak sira hasoru difikuldade boot tanba material konstrusaun nian ne'ebé kompania fornese mai tarde los.

"Agora ami ida borong ne'e, ami na servisu la lao to'o agora. Material kuaze semana ida tomak la mai, no agora servisu ida ne'ebé ami halo fulan rua no tolu nian ne'e sai fali ba fulan ha'at no lima. Ida ne'e mak halo ami triste," deklara Miguel.

Nia mós hatutan katak badaen sira lor-loron husu hela deit ba kompania no enjineiru sira kona-ba bainhira mak sasan konstrusaun ne'e mai. "Karik material konstrusaun ne'e mai kompletu, entaun ami badaen ne'e finaliza ona obra ne'e tuir tempu ne'ebé mak iha," nia hateten ho esperansa.

MJDAK liu husi Xefi Departamentu Infraestrutura, Paulo Amaral, no ekipa teknika sei kontinua monitoriza progresu obra atu garante katak projetu infraestrutura sira implementa ho transparénsia no responsabilidade, tuir padraun ne'ebé estabelese ona, atu asegura benefísiu ba juventude no komunidade sira.

#MediaMjdak