Dili, 14 Novembru 2025 – Diretóra Jerál Servisu Korporativus (DJSK), Sra. Isabel Adalziza Fátima Rodrigues Ferreira, hamutuk ho Diretór Nasionál Patrimóniu, Lojístika no Infraestrutura (DNPLI), Sr. Abel de Jesus Andrade, realiza reuniaun Diresaun Jerál nian hodi diskute kona-ba jestaun OJE no ezekusaun Planu Asaun Anuál (PAA). Atividade ne'e hala'o iha Salaun Magna MJDAK, Lecidere.

Diskusaun Fokus ba Ezekusaun PAA no OJE 2026

Objetivu prinsípál reuniaun ne'e mak atu diskute, avalia, no haree progresu serbisu hotu-hotu nian, no oinsá prepara jestaun atu ezekuta servisu tuir Planu Asaun Anuál (PAA) molok taka konta tinan ne'e nian. Diskusaun mós haree kona-ba oinsá halo avaliasaun ba servisu Diretór Jerál, Diretór Nasionál, no Xefe Departamentu sira, atu garante efisiénsia iha jestaun Orsamentu Jerál Estadu 2026 nian.

DJSK Kestiona Maka'as Jestaun Transporte Operasionál

Nu'udar responsável ba servisu korporativus, Diretóra Jerál DJSK, Sra. Isabel Adalziza Fátima Rodrigues Ferreira, kestiona maka'as kona-ba jestaun transporte operasionál ne'ebé Ministériu iha. Kestaun ne'e krítiku atu asegura jestaun ne'ebé di'ak ba viaturas sira hodi halo atendimentu ba Diresaun hotu-hotu nia servisu.

Kestaun ne'e subliña katak jestaun di'ak ba lojístika no infraestrutura nu'udar fator desizivu ida atu asegura katak Planu no Programa MJDAK nian bele implementa tuir tempu.

Partisipa iha atividade ne'e mai hosi: Diretór Nasionál Jestaun Finanseiru, Sr. Guido Monteiro, Diretór Nasionál Administrasaun no Rekursu Umanu, Sr. Florindo Napoleão dos Santos, Xefe Departamentu Planeamentu no Koperasaun, Sr. Jacinto António Ximenes no Xefe Sekretaria Diresaun Jerál, Sra. Mafalda da Costa Soares, hamutuk ho Asesór Prinsipál na'in Rua.

#MídiaMJDAK