DILI, 28 Setembru, GKI-- Ministériu Juventude, Desportu Arte no Kultura (MJDAK) ho Ajensia ONU UNFPA, planeia iha tinan 2027, sei aloka orsamentu hodi fo formasaun no apoiu fundus ba grupu agrikultura foinsae 40 iha teritoriu Timor Leste.

Atu realiza planu ne’e, Kinta (24/09),  Ministériu Juventude, Desportu Arte no Kultura, Nelyo Isaac Sarmento ho Kordenadóra Rezidenti Nasoins Unidas iha Timor-Leste, Funmi Balogun no Reprezentante UNFPA iha Timor Leste, Navcha Suren diskute planu no programa servisu hamutuk konaba formasaun ba foinsa’e sira iha setór agrikultura iha Timor-Leste.

Sorumutu iha Salaun Magna MJDAK Lecidere Dili Timor-Leste ne’e, partisipa husi Diretur Jeral Juventude, Mario Tilman no ekipa tekniku UNFPA nina. Iha diskusaun entre parte rua,  Ministru Juventude Desportu Arte no Kulura, Nelyo Isaac Sarmento (NIS),  agradese ba UNFPA hodi serbisu hamutuk ho MJDAK halo planu  prioridades ba  problema joven sira nian.

“Ideia UNFPA,  desde inisiu kedas ita hakarak diskute. Tanba  iha grupu joven barak mak ita harii fo prioridades barak tama iha asuntu politika. Maibe ita lahatene joven sira ne’e atu halo saida. Izemplu ida mak joven reprezentante iha konsellu suku mas  ita preukupa tebes, saida mak nia atu kontribui ba joven no oinsá liga mós ba iha desentralizasaun poder lokal. Mas sira tenki hatene potensia husi suku ne’ebé nia reprezenta hodi bele partisipa iha dezenvolvimentu munisipais,” NIS esplika.

Tuir NIS,  programa sira ne’ebé UNFPA aprezenta, oinsá bele lori foinsae sira ba iha emprendedorizmu hodi  uza oportunidade rikeza ne’ebé iha sira nia suku   atu bele produs osan ba sira nia nesesidade.

Problema agrikultura ne’e, NIS hatutan, importante ba foinsae  oinsá mak bele produz no mós oinsá mak bele lori produsaun to’o iha merkadu hanesan  programa  merenda eskolar. Tanba kada tinan governu koloka miloens de dolares ba iha programa merenda escolar.

“Oinsá mak ita bele kria grupu agrikultor foinsae hodi  rekolla fali metade husi miloens de dolares ne’ebé governu gasta ne’e, fila fali ba joven sira nia benefisiu rasik,” NIS esperansa.

Governu hamutuk ho UNFPA planeia  iha tinan 2027, fo formasaun ba grupus agrikultor foinsae 40 iha munisipius  ne’ebé mak konsidera vulneravel liu.  Planu programa  ne’e,  governu hamutuk ho  UNFPA mak sei aloka orsamentu  ba   formasaun  iha setór agrikultura.  #MédiaMjdak#