DILI, 24 Jullu 2025 – Reuniaun importante ida entre Diretór Nasionál no Diretór-Jerál sira husi nasaun membru Komunidade ba País Lian Portugés (CPLP) hala'o ona ohin iha Hotel JL World, Dili. Enkontru ne'e nu'udar preparasaun esensiál ba Konferénsia Ministru sira nian husi Juventude no Desportu CPLP, ne'ebé sei realiza iha loron 27 Jullu 2025.

Planu Asaun Juventude no Dezafiu Sira

José Mateus (Diretór Nasionál Juventude Angola no Prezidente Komisaun Juventude CPLP) subliña katak objetivu prinsipál husi reuniaun ne'e mak atu diskute no aprova Planu Asaun Juventude ba tinan 2026-2036.

Iha diskusaun, Diretór-Jerál sira foka mós ba dezafiu sira ne'ebé juventude iha espasu CPLP nian hasoru, hanesan: Saúde, Edukasaun, Empregu, Habitasaun.

Timor-Leste Simu Elojiu no Sei Sai Uma-Nain Fila-Fali

Timor-Leste nu'udar Uma-Nain ba XII Jogos Desportivos CPLP 2025 halo aprezentasaun kona-ba progresu preparasaun. Aprezentasaun ne'e hetan elojiu boot husi nasaun membru sira ba Timor-Leste nia ospitalidade no organizasaun.

Iha notísia di'ak ida tan, iha reuniaun ne'e mós konfirma ona katak Timor-Leste sei sai filafali Uma-Nain ba Jogos CPLP iha tinan 2034. Ne'e hatudu konfiansa maka'as husi CPLP ba kapasidade Timor-Leste nian.

Koperasaun Antidopajen

Diskusaun importante ida mós akontese kona-ba kestaun antidopajen. Timor-Leste prepara hela atu estabelese ninia autoridade rasik hodi lida ho kestaun antidopajen, no sei fortifika koperasaun ho Autoridade Antidopajen Portugál (ADoP Portugal) hodi garante desportu ne'ebé moos.

#MídiaMJDAK