DILI, 25 MAIU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hala'o enkontru kona-ba infraestrutura desportu iha Salaun Magna, Lecidere, Dili. Enkontru ne'e partisipa husi Diretór Servisu Kooperasaun (DJSK), Diretór Nasionál Infraestrutura Lojístika no Patrimóniu (DNPLI), xefe departamentu sira, no tékniku sira husi MJDAK.

Objetivu prinsipál enkontru ne'e atu ko'alia kona-ba progresu no aselerasaun projetu infraestrutura desportiva ne'ebé la'o daudaun iha kapitál no rejiaun sira. Ekipa tékniku aprezenta progresu kona-ba kampu desportu hanesan Kampu Bekora, Taibesi, Alor, no Komoro, inklui planu atu harii kampu multi-uzu iha Lahane no Bemori.

Puntu xave sira husi enkontru: MJDAK fó prioridade ba aselera projetu infraestrutura desportu ne'ebé atraza kleur ona; Governu hakarak garante katak konstrusaun kampu desportu no instalasaun sira remata tuir orariu ne'ebé estabelese; Kampu multi-uzu sira iha Lahane no Bemori tama ona iha faze preparasaun ba implementasaun; Enkontru mós ko'alia kona-ba rezolve kestaun rai hodi evita atrazu iha dezenvolvimentu projetu; Infraestrutura desportu konsidera nu'udar investimentu krusiál ba juventude no dezenvolvimentu desportu nasionál.

Iha ninia intervensaun, Ministru Nelyo Isaac Sarmento hateten: "Ita tenke aselera kedas konstrusaun ba kampu sira ne'ebé iha tinan barak ona, atu nune'e ita bele vizita fali projetu sira seluk ne'ebé planeadu tanba tempu la'o daudaun."

MJDAK reafirma ninia kompromisu atu hadi'a infraestrutura desportu nasionál hodi kria ambiente ne'ebé konduzivu ba juventude no atleta Timor-Leste nian, hodi suporta dezenvolvimentu desportu iha nível lokál no internasionál.

#MediaMjdak