DILI, 25 Agostu 2025 – Ministériu Juventude, Desportu, Arte no Kultura (MJDAK), liuhusi Diresaun-Jerál Desportu (DJD), hamutuk ho entidade desportiva nasionál sira, diside ona katak Festivál Nasionál Desportu (FND) ba dala VI sei realiza iha loron 5 to'o 19 Novembru 2025.

Desizaun importante ne'e hetan iha reuniaun kordenasaun ne'ebé hala'o iha Salaun Magna MJDAK, Lecidere, Dili.

Kordenasaun Ho Objetivu Klaru

Reuniaun ne'e lidera husi Diretór-Jerál Desportu, Sr. João M. Rodrigues, akompaña husi Diretór Nasionál Desportu Federadu (DNDF), Sr. Oscar Dias Quintas. Partisipante sira inklui Vise-Prezidente Konfederasaun Desportiva Timor-Leste (CDTL), Sr. Inocensio Araujo da Silva, no Prezidente Komité Paralímpiku Nasionál Timor-Leste (CPNTL), Sr. Mateus Lucas.

Tuir Diretór-Jerál Rodrigues, objetivu prinsipál husi reuniaun ne'e mak atu diskute Termu Referénsia (TOR) ba preparasaun FND nian iha fulan-Novembru:

"Ohin ita halo diskusaun kona-ba preparasaun atu realiza FND. Ida-ne'e inklui diskute TOR hamutuk ho federasaun sira atu bele haree ba idade atleta sira ne'ebé atu partisipa, nomós modalidade hira mak sei kompete, inklui mós diside data implementasaun ba realiza atividade ne'e," Sr. João M. Rodrigues hateten.

Importánsia ba Desportu Paralímpiku

Prezensa husi Prezidente CPNTL, Sr. Mateus Lucas, hatudu kompromisu MJDAK nian atu garante inkluzaun kompleta iha FND ba dala VI ne'e, fó fatin importante ba desportu paralímpiku.

FND nu'udar eventu nasionál boot ida ne'ebé ho objetivu atu deskobre talentu foun husi munisípiu sira no atu prepara atleta sira ba kompetisaun internasionál iha futuru.

MJDAK, hamutuk ho parseiru CDTL no CPNTL, sei kontinua servisu hamutuk hodi garante katak FND 2025 sei la'o ho susesu no fó benefísiu ba dezenvolvimentu desportu nasionál.

#MídiaMJDAK