Dili, 06 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hato’o mensajen importante ba funsionáriu sira durante atividade inspesaun isar Bandeira Nasionál ba fulan Outubru. Serimónia ne'e hala'o iha resintu MJDAK, Lecidere, Dili.

Ministru Sarmento nia asuntu fokus liu ba pontu rua (2): nesesidade ba Literasia Dijitál hodi kombate fake news, no importánsia husi Disiplina Servisu atu garante efisiénsia servisu públiku.

1. Hakbit Literasia Dijitál hodi Kombate Informasaun Falsu

Nu’udar Ministériu ne’ebé iha responsabilidade ba área juventude, desportu, arte no kultura, Ministru Nelyo Isaac Sarmento afirma katak funsionáriu sira tenke iha kapasidade hodi análiza informasaun ho lolos no kredivel antes fahe ba sosiedade.

"Ita tenke iha responsabilidade hodi la monu ba influénsia Artificial Intelligence (AI) no informasaun falsu sira iha Média Sosiál ne’ebé oras ne'e daudaun mundu hotu preokupa," Ministru apela.

Ministru mós sita Amu Papa Francisco nia liafuan: "Uza liberdade atu halo buat hotu, maibé la’os atu hateten aat ema. Se wainhira hateten aat ema, ne’e aumenta ita-nia sala." Mensajen ne'e hateten katak uza liberdade iha espasu dijitál tenke akompaña ho responsabilidade morál no étika.

2. Disiplina Servisu no Padraun Salariál Funsionáriu Públiku

Pontu importante seluk mak kona-ba situasaun orsamentu no eforu hodi profesionaliza Funsaun Públika.

Ministru informa katak Ministériu ida-ne'e sofre orsamentus ba tinan 2026, ne'ebé bele iha impaktu diretaba funsionáriu sira.

Tanba ne'e, Ministru Nelyo Isaac Sarmento apela ba funsionáriu sira hotu atu hatudu disiplina servisu no produtividade aas.

"Funsaun Públika halo hela padraun ida atu funsionáriu no kazuál hotu iha padraun ida-ne'ebé hanesan, liuliu ba iha nivel saláriu, hodi haree tuir idak-idak nia nivel no produtividade ne'ebé hatudu iha servisu fatin. Disiplina servisu mak fator importante ida hodi profesionaliza ita-nia-an," afirma.

Ikusliu, Ministru husu ba Kargu Xefia no Diretór hotu iha MJDAK atu orienta no fó treinu ba funsionáriu sira atu bele aprende no hala'o servisu ho di'ak.

Partisipa iha atividade isar bandeira ne'e mai husi Diretór Jerál sira, Diretór Nasionál sira, Kargu Xefia no funsionáriu sira husi MJDAK no Sekretaria Estadu Arte no Kultura (SEAK).

#MídiaMJDAK